«Tranśniefć» nie razhladaje mahčymaść kupli biełaruskich trubapravodaŭ

Rasijskaja «Tranśniefć» nie razhladaje mahčymaść kupli trubapravodnaj sistemy Biełarusi, zajaviŭ prezident kampanii Mikałaj Tokaraŭ.

«Heta tema ni razu aficyjna nie źjaŭlałasia pradmietam pieramoŭ z našymi biełaruskimi partniorami. Ni razu ŭ „Tranśniefci“ nie prymałasia rašeńnie prapracavać heta pytańnie. My nikoli aficyjna nie zajaŭlali, što chočam zrabić taki nabytak. Kali takoje pytańnie i ŭźnikała, to čysta ŭ tearetyčnaj płoskaści. Tearetyčna tak, možam, ale ci varta?» — cytuje Tokarava RIA Novosti.

Pavodle jaho słoŭ, takich prapracovak «Tranśniefć» nie rabiła i na hetym etapie nie ličyć patrebnym rabić.

«Ja nie baču padstaŭ rabić temu kupli pradmietam abmierkavańnia. Kali ŭźniknie takaja zadača — budziem jaje razhladać. Ale siońnia na paradku dnia jana nie staić», — zaznačyŭ jon.

U pačatku krasavika vice-prezident kampanii Michaił Barkoŭ kazaŭ, što «Tranśniefć» moža vykupić biełaruskuju častku naftapravoda «Družba», ale nijakich pieramoŭ nie viadziecca. Barkoŭ rastłumačyŭ, što pytańnie kupli biełaruskaj častki trubapravoda patrabuje najpierš palityčnaha rašeńnia.

Trubapravod «Družba» praciahłaściu prykładna 6 tysiač kiłamietraŭ źjaŭlajecca najbujniejšaj sistemaj trubapravodaŭ u śviecie. Paŭnočny ŭčastak naftapravoda prachodzić pa Biełarusi, Polščy i Hiermanii, paŭdniovy — pa Ukrainie, Čechii, Słavakii i Vienhryi. U Rasii naftapravod prachodzić pa 32 rajonach vaśmi abłaściej.

Maryna Nosava, BiełaPAN.

Kamientary da artykuła