Nazarbajeŭ prybyŭ u Biełaruś ciškom

Čakali ŭ niadzielu, a akazałasia, što prylacieŭ u subotu.

Prezident Kazachstana Nursułtan Nazarbajeŭ prybyŭ z aficyjnym vizitam u Minsk viečaram 13 maja. Na paniadziełak zapłanavanyja jaho pieramovy z Alaksandram Łukašenkam u vuzkim i pašyranym składach.

Adnak, jak paviedamiŭ BiełaPAN kiraŭnik pres-słužby prezidenta Biełarusi Pavieł Lohki, niefarmalnyja pieramovy dvuch lidaraŭ užo adbylisia: 12–13 maja ŭ rezidencyi Viskuli ŭ Biełaviežskaj puščy Nazarbajeŭ i Łukašenka abmierkavali šyrokaje koła pytańniaŭ dvuchbakovych adnosinaŭ napiaredadni svaich aficyjnych pieramovaŭ u Minsku.

Raniej aficyjny pradstaŭnik MZS Kazachstana Ałtaj Abibułajeŭ paviedamlaŭ, što kiraŭniki dźviuch dziaržaŭ abmiarkujuć u Minsku «stan i pierśpiektyvy kazachstanska-biełaruskaha supracoŭnictva ŭ palityčnaj, handlova-ekanamičnaj, kulturna-humanitarnaj halinach. Taksama płanujecca abmien mierkavańniami pa šyrokim śpiektry prablem u mižnarodnym paradku dnia».

Pavodle jaho słoŭ, «asablivaja ŭvaha» budzie nadavacca praktyčnym krokam pa ŭmacavańni ŭzajemadziejańnia pamiž Kazachstanam i Biełaruśsiu ŭ ramkach pramysłovaha, sielskahaspadarčaha, navukova-techničnaha, transpartnaha i inviestycyjnaha supracoŭnictva, a taksama efiektyŭnym vykanańni płana sumiesnych mierapryjemstvaŭ na 2012–2013 hady ŭ miežach realizacyi prahramy ekanamičnaha supracoŭnictva pamiž Kazachstanam i Biełaruśsiu na 2009–2016 hady.

Akramia taho, Nazarbajeŭ i Łukašenka razhledziać pytańni supracoŭnictva ŭ ramkach rehijanalnych intehracyjnych ab`iadnańniaŭ: SND, JeŭrAzES, Mytnaha sajuza, AEP i ADKB. Pa vynikach sustreč płanujecca pryniaćcie sumiesnych zajaŭ kiraŭnikoŭ dziaržaŭ, a taksama padpisańnie šerahu mižuradavych pahadnieńniaŭ.

Taksama ŭ prahramie vizitu Nazarbajeva ŭ Minsk — uskładańnie viankoŭ da abieliska na płoščy Pieramohi.

Kamientary da artykuła