U Administracyju prezidenta pieradadziena pietycyja ŭ abaronu Bialackaha
3 žniŭnia ŭ pryjomnuju Administracyi prezidenta Biełarusi pieradadziena pietycyja ŭ abaronu Alesia Bialackaha —vice-prezidenta Mižnarodnaj fiederacyi pravoŭ čałavieka, kiraŭnika zakrytaha ŭładami pravaabarončaha centra «Viasna».
Dakumient padpisali staršynia RHA «Biełaruski Chielsinkski kamitet» Aleh Hułak, paplečnica Bialackaha pa «Viaśnie» Taćciana Raviaka, lidar ruchu «Za Svabodu» Alaksandr Milinkievič, namieśnik RHA «Biełaruskaja asacyjacyja žurnalistaŭ» Andrej Bastuniec, kiraŭnik Asamblei NDA Siarhiej Mackievič, kiraŭnik abjadnańnia «Centr pa pravach čałavieka» Raisa Michajłoŭskaja i inšyja hramadskija aktyvisty.
Siońnia padpisanty pryjšli da prezidenckaj administracyi. U pryjomnuju pietycyju adnieśli Aleh Hułak i Taćciana Raviaka. Akcyja prajšła bieź incydentaŭ.
Sutnaść dakumienta zvodzicca da patrabavańnia nieadkładna i biezumoŭna vyzvalić Alesia Bialackaha i inšych «viaźniaŭ sumleńnia».
«My ličym asudžeńnie pravaabaroncy niezakonnym, źviazanym ź jaho pravaabarončaj dziejnaściu, — havorycca ŭ pietycyi. — Aryšt Alesia staŭ vynikam šmathadovaj, metanakiravanaj palityki biełaruskich uładaŭ adnosna pravaabarončych i hramadskich arhanizacyj krainy: pazbaŭleńnia ŭ sudovym paradku dziaržaŭnaj rehistracyi, stvareńnia pieraškod, u tym liku na zakanadaŭčym uzroŭni, u rehistracyi NDA, najaŭnaści kryminalnaj adkaznaści za dziejnaść ad imia niezarehistravanych arhanizacyj, faktyčnaj zabarony i kryminalizacyi zamiežnaj finansavaj dapamohi».
Aŭtary pietycyi patrabujuć «spynić nacisk na pradstaŭnikoŭ hramadzianskaj supolnaści krainy i pravaabaroncaŭ i ich pieraśled, a taksama pryvieści zakanadaŭstva Biełarusi ŭ adpaviednaść ź mižnarodnymi standartami ŭ halinie abarony pravoŭ čałavieka».
4 žniŭnia spaŭniajecca hod z momantu zatrymańnia Alesia Bialackaha.U listapadzie sud Pieršamajskaha rajona Minska pryznaŭ Bialackaha vinavatym va ŭtojvańni dachodaŭ u asabliva bujnym pamiery i pryhavaryŭ jaho da 4,5 hoda pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Padstavaj dla kryminalnaha pieraśledu stała najaŭnaść u pravaabaroncy zamiežnych bankaŭskich rachunkaŭ, srodki ź jakich vykarystoŭvalisia dla dziejnaści pravaabarončaha centra «Viasna». Sud taksama nie pryniaŭ da ŭvahi toje, što ŭron, jaki nibyta nanios dziaržavie Bialacki, byŭ poŭnaściu kampiensavany za košt dobraachvotnych achviaravańniaŭ hramadzian.
Aryšt Bialackaha mieŭ šyroki mižnarodny rezanans. Biełaruski pravaabaronca abjaŭleny viaźniem sumleńnia.
Na minułym tydni hrupa pravaabaroncaŭ i demakratyčnych aktyvistaŭ Rasii vystupiła ź inicyjatyvaj abjavić 4 žniŭnia Mižnarodnym dniom salidarnaści z hramadzianskaj supolnaściu i pravaabarončym rucham Biełarusi.