Siońnia Kryžaŭźvižańnie ŭ katolikaŭ abodvuch abradaŭ
«Zachavaj vierny Tvoj narod siłaju Tvajho Kryža».
14 vieraśnia biełaruskija katoliki vizantyjskaha i łacinskaha abradaŭ śviatkujuć Suśvietnaje Uzvyšeńnie Pačesnaha i Žyćciadajnaha Kryža. Dla
Śviata Kryžaŭźvižańnia naležyć da vielmi staražytnych śviataŭ, ale, jak historyja vyjaŭleńnia śviatoha Haspodniaha Kryža, tak i historyja ŭstanaŭleńnia śviata pakrytyja smuhoj roznych lehiend, i tamu składana adroźnić histaryčnuju rečaisnaść ad zvyčajnaj lehiendy. Ahulnapryniata ličyć, što pačatak śjatu dało aśviačeńnie chrama Haspodniaha Uvaskrasieńnia ŭ Jerusalimie, jaki pabudavaŭ na Hałhofie rymski imperatar Kanstancin Vialiki. Aśviačeńnie mieła miesca 13 vieraśnia 335 hoda, a na nastupny dzień adbyłosia ŭračystaje ŭzvyšeńnie śviatoha kryžovaha dreva, adšukanaha raniej maci impieratara carycaj Alenaj.
Dla chryścijan śviaty kryž — heta viečna žyvy simvał biaskoncaj Božaj lubovi da hrešnaha čałavieka, simvał Chrystovaj achviary i pieramohi nad śmierciu i djabłam, simvał adkupleńnia i zbaŭleńnia. Kładučy na sabie znak śviatoha kryža, chryścijanin kožny raz vyznaje svaju vieru ŭ Zbaŭcu.
«Zbaŭ, Hospadzie, ludziej Tvaich i błasłavi nabytak Tvoj. Daruj supakoj śviatoj Tvajoj Carkvie i pieramohu nad usimi niahodami, i zachavaj vierny Tvoj narod siłaju Tvajho Kryža», śpiavajuć na śviatočnaj liturhii vierniki vizantyjskaj tradycyi. U hety dzień dla ŭspaminu pakutaŭ Zbaŭcy carkva zaachvočvaje viernikaŭ da strohaha postu.