Summertime and lazing is easy

Navat na staronkach aficyjnych mas-medyja temperaturnyja rekordy vycieśnili pracoŭnyja.

Feljeton Lolika Uškina.

Niešta nichto nie adčuvaje ŭzrušeńnia ad taho, što 267 haspadarak krainy vyjšli na 4 000 litraŭ udojnaści ad karovy (tak piša «Saŭbiełka»). A z kulbitami hradusaŭ Celsija sprava inšaja. Jak tolki sonca raskumaryłasia, usimi avałodali pafihizm i apatyja. Karjernyja, seksualnyja i asabistyja ŭstanoŭki zabiła idefiks: pieratvarycca ŭ «ščaślivaha dzikuna» z knižki Ruso, raspłastacca pad palmaj na bierazie akijanu i łuzać «Baŭnci».

Inšymi słovami, pamier nieabchodnaj arhanizmu dozy fizyčnaj asałody rezka padskočyŭ. Pryčym heta tolki pačatak sezonu, a što budzie niedzie tam u lipieni?.. Pavalnaja sijesta.

Praanalizavaŭšy sacyjalna-psychalahičnyja vyniki hlabalnaha paciapleńnia ŭ Biełarusi, musim skazać sami sabie strašnuju reč: «Šuchier! Biełaruskaja pratestanckaja daktryna apynułasia pad pahrozaj! Nazirajecca paŭzučaja revizija našaha etyčnaha dyskursu. Tupoje žadańnie płocievaj asałody, byccam virus, akupuje sektar za sektaram mazhavoha vinčestera».

Naturalna, pieršym zakładnikam temperaturnaha coup d'etat stali ŭłady. Pakul apošnimi dniami pipł zahibaŭsia ad śpiakoty, jaho słuhi siadzieli ŭ abstalavanych kandycyjanerami kabinetach i mazhavali, jak da 2010 hodu transfarmavać biełaruskuju viosku ŭ sen-symonaŭskija falanstery.

Abłamiciesia! Nia treba stykieraŭ «Siońnia Ŭkraina — zaŭtra Biełaruś», hrafici «Zubra», sajtu «Chartyi» i navat zamiežnych hałasoŭ, kab zarubić zhadany prajekt. Jak tolki termometar pakaža 25 hradusaŭ, bryhadzir skaža: «Ładna, chłopcy, pierakur. A ty, Vasia, duj u mahaz pa byrła». Tut prahramie i kapiec.

Baraćba ź cialesnymi praktykami, vyklikanymi źmienami ŭ atmasfery, robicca dla nas archiaktualnaj. Cikava, što toj ža samy hiemaroj dastavaŭ dziaržaŭny menedžment u čas pierachodu hramadztva ad feadalizmu da kapitalizmu — źniščyć u ciele ŭsie nie adpaviadajučyja pracoŭnaj dyscyplinie spakusy. Achviaraj kampanii, u chodzie jakoj byŭ stvorany dyscyplinarny tatalitarny aparat, stali seks i šyza.

Biełarusi nia mieniej, čym Eŭropie, patrebien dziaržaŭny instytut kantrolu za patalohijami (ciaper heta budzie nazyvacca tak) rassłabonu, jaki moh by pravodzić analahičnyja reformy: u sadkach nafih admianić usie prahułki, zabaranić plažy, pavykidvać łaŭki z parkaŭ. Sami parki źniščyć.

A ŭvosień padčas dziažurnaha referendumu pravieści papraŭku da artykułu Kanstytucyi ab tym, što hramadzianie RB majuć prava na adpačynak. U novaj redakcyi, jakuju, naturalna, padtrymajuć 84% tych, chto maje prava hałasavać, artykuł pavinien hučać nastupnym čynam: «Hramadzianie majuć prava na adpačynak ad adpačynku u formie pracy».

• 0
• 0
• 0
• 0
• 0
• 0
• 0
• 0