Hrafici jak srodak infarmavańnia

Na vulicach Horadni źjavilisia nadpisy — apošni adčajny srodak tych, chto pratestuje suprać rujnavańnia starych damoŭ.

Psavać ścieny, nia važna jakimi słovami, — u lubym razie niadobra. Dumaju, što abaroncy horadu heta razumiejuć. Ale voś znoŭku źjavilisia nadpisy ŭ roznych miescach staroj Horadni. Na ścianie pa vulicy Uryckaha, naprykład, siniaj farbaj napisana: «Tut byŭ dom. Čyj zaŭtra?» Staruju kamianicu, jakaja stajała na hetym miescy, sapraŭdy niadaŭna razburyli. Ułady skazali, što jana była ŭ avaryjnym stanie, i dakładna takuju pabudujuć nanoŭ. Ale placoŭku padčyścili, i nijakaha budaŭnictva niama.

Možna ŭbačyć navat nadpisy na haradzienskich tratuarach: «Hańba čynoŭnikam!», «Bruk — na stahodździ, plitka — na dva hady». Čaho možna čakać ad hrafici, jakoj reakcyi, ja ŭžo nie kažu pra karyść?

Nam patelefanavaŭ adzin małady aktyvist i skazaŭ, što źmiest nadpisaŭ budzie nervavać ułady. Na bolšaje raźličvać nie davodzicca, pakolki, kali čynoŭniki vyrašyli niešta zrabić, jany nikoli nia spyniacca, kanstatavaŭ jon. Dyk moža, varta zasiarodzicca lepiej na pašyreńni infarmacyi pra padziei ŭ staroj Horadni, źviartacca ŭ roznyja ŭstanovy? Na žal, heta taksama nie daje nijakaha vyniku, skazaŭ hety aktyvist.

Inšy ŭdzielnik kampanii zmahańnia za zachavańnia histaryčnaj zabudovy nahadaŭ nam pra viadomy prykład: źniščeńnie domu ŭ styli kanstruktyvizmu na Horkaha, 29. Baraćba za jaho adbyvałasia całkam ŭ cyvilizavanym rečyščy. Byli sabranyja podpisy haradžanaŭ sa zvarotam da ŭładaŭ, aŭtarytetnyja historyki vykazalisia za jaho zachavańnie, byŭ zvarot u ministerstva kultury, narešcie źjavilisia publikacyi ŭ presie, navat siužet na telekanale ONT. Paśla hetaha ŭłady adrazu zrujnavali dom: im zamanułasia pašyryć na metar vulicu, chacia jon u hetym zusim nie pieraškadžaŭ.

Jak u takoj sytuacyi zmahacca? Zbor podpisaŭ, zvaroty da samich uładaŭ, u prakuraturu absalutna biezvynikovyja, havorać niekatoryja aktyvisty kampanii. Jany ŭžo pierakanalisia, što lubaja inicyjatyva źnizu tolki razdražniaje ŭłady, jakija jašče z bolšym impetam imknucca tady davieści svaje plany da kanca.

Što ŭvohule na siońniašni dzień ujaŭlaje ź siabie kampanija pa supraćstajańniu rekanstrukcyi histaryčnaj zabudovy? Kruhłasutačnych dziažurstvaŭ moładzi kala damoŭ, jakija buduć razburany, daŭno niama. Zatoje tolki što źjaviŭsia novy internet‑sajt abaroncaŭ Horadni, pryčym na anhielskaj movie. 17 lipienia pierad haradzienskaj moładździu vystupiŭ z kancertam Alaksandar Pamidoraŭ — jakraz u ramkach akcyi «Muzyki — suprać razbureńniaŭ». Druhaja mastackaja akcyja — skulpturny plener na bierazie Niomana «Chrystos pryziamliŭsia ŭ Harodni» nie adbudziecca, ułady adrazu zaŭparcilisia i nie dali zhody. Nie spadabałasia im «kramoła» temy: jak heta Chrystos moh pryziamlicca ŭ našym abłasnym centry? I navošta jaho tady vyleplivać ź piasku ŭ lažačym vyhladzie?

Aleś Kavaloŭ bulletinonline.org

• 0
• 0
• 0
• 0
• 0
• 0
• 0
• 0