Udzielnikaŭ akcyi pamiaci pamierłaha ŭ SIZA Ihara Pcičkina čakaje sud, u tym liku ciažarnuju siastru
Siońnia ŭ Minsku kala turmy na Vaładarskaha miełasia prajści akcyi pamiaci pamierłaha ŭ SIZA Ihara Pcičkina.
Svajaki sabralisia na Niamizie i rušyli ŭ bok turmy. Na rahu Haradskoha vału i Niamihi da ŭdzielnikaŭ akcyi padjechaŭ sini mikraaŭtobus z numar 9427 IK7.
Zatrymali ŭdzielnikaŭ akcyi, a taksama karespandenta Svabody Aleha Hruździłoviča i žurnalistaŭ «Našaj Nivy» Irynu Arachoŭskuju i Hannu Badziaku, paviedamlaje Radyjo Svaboda.
Usich advieźli ŭ Centralnaje RUUS.
A 16-j hadzinie usich zatrymanych žurnalistaŭ vypuścili pry sadziejničańni pres-sakratara HUUS Minharvykankama Alaksandra Łastoŭskaha, jaki pryjechaŭ u RUUS.
Udzielniki akcyi zastalisia (Ihar Kavaloŭ, Iryna Miranovič(siastra Ihara, jana ciažarnaja na 9-m miesiacy), Alaksandr Haŭryš, Viktar Katlanik, Siarhiej Jaŭmienaŭ - rodny brat Pcičkina. Praź niejki čas Irynu Miranovič vypuścili.
U žurnalistaŭ uziali adbitki palcaŭ, fota i videa materyjały vydalili.
U dačynieńni da astatnich praviedzieny administracyjnyja pracedury.
Iryna Miranovič, jakaja znachodzicca na dziaviatym miesiacy ciažarnaści, była adpuščanaja ź milicyi. Joj uručyli pozvu, jakaja pradpisvaje źjavicca 16 vieraśnia ŭ sud Centralnaha rajona. Astatnija ŭsio jašče zastajucca ŭ milicyi. Nie vyklučana, što jany buduć zastavacca pad vartaj da suda, paviedamlaje BiełaPAN.
Taksama pravaabaroncy paviedamili pra zatrymańnie siońnia ŭ Minsku Andreja Bandarenki, kiraŭnika pryvatnaha kulturna-aśvietnickaj ustanovy "Płatformy inaviejšn", jakaja akazvała dapamohu svajakam Pcičkina. Jon taksama mieŭ namier pryniać udzieł u paminalnaj akcyi kala SIZA. Bandarenku dastavili ŭ Maskoŭskaje RUUS.
Nahadajem, što 21-hadovy Ihar Pcičkin musiŭ adbyć u SIZA na Vaładarskaha trochmiesiačny aryšt: sieŭ za rul aŭto, chacia byŭ pazbaŭleny pravoŭ.
30 lipienia jon pryjechaŭ u Zavodskaje RUUS Minska, kab adbyć pakarańnie i zatym byŭ dastaŭleny ŭ SIZA № 1 na Vaładarskaha. 4 žniŭnia Pcičkin pamior.
Na sustrečy z načalnikam SIZA rodnym chłopca paviedamili, što ŭ Ihara 3 žniŭnia pačałosia «psichamatornaje ŭzbudžeńnie». I jaho źmiaścili ŭ miedycynskuju čaść, «dzie daviałosia fiksavać jaho miakkimi ramianiami». Na fatazdymkach trupa Pcičkina zaŭvažnyja šmatlikija siniaki. Foty vykładzienyja ŭ ahulny dostup u supołcy Ukantakcie.
Aficyjnaja pryčyna śmierci Pcičkina pakul nie nazyvajecca. Praciahvajucca ekśpiertyzy.
Kamientary