Biełaruskaja čyhunka adkryje rehularny ruch elektraciahnikoŭ rehijanalnych linij na ŭčastku Minsk -- Žłobin 29 vieraśnia.
Pa maršrucie Minsk — Žłobin — Minsk budzie kožny dzień kursiravać ciahnik rehijanalnych linij biźnies-kłasa №815/816.
Sa Žłobina jon budzie adpraŭlacca ŭ 06:08 i prybyvać u stalicu ŭ 08:47. Čas jaho adpraŭleńnia ź Minska — 17:30, prybyćcia ŭ Žłobin — 20:10.
Adlehłaść ad Minska da Žłobina ciahnik rehijanalnych linij biźnies-kłasa budzie pieraadolvać u siarednim za 2 hadziny 40 minut.
U darozie praduhledžana ŭsiaho try prypynki — Asipovičy, Babrujsk i Čyrvony Bierah.
Akramia taho, pa hetym maršrucie buduć kožny dzień kursiravać elektraciahniki rehijanalnych linij ekanom-kłasa.
"Paśla zaviaršeńnia rekanstrukcyi infrastruktury na ŭčastku Minsk - Rudziensk kolkaść elektraciahnikoŭ i čas ich znachodžańnia ŭ darozie na ŭčastku Minsk — Žłobin buduć skarektavanyja", — adznačyli ŭ pres-słužbie, dadaŭšy, što raskład ruchu elektraciahnikoŭ budzie raźmieščany na sajcie Biełaruskaj čyhunki i infarmacyjnych stendach vakzałaŭ i stancyj.
Arhanizacyja ruchu ciahnikoŭ na elektraciazie ad biełaruskaj stalicy da Žłobina stała mahčymaj dziakujučy elektryfikacyi ŭčastka Asipovičy — Žłobin, jaki płanujecca adkryć 28 vieraśnia hetaha hoda.
Kamientary