Dzie adznačyć Dzień rodnaj movy: padziei ŭ Biełarusi i zamiežžy
Kali vam patrebny byŭ šturšok, kab pačać havaryć pa-biełarusku, to voś jon. Častka imprez zapłanavana niepasredna na 21 lutaha, a štości projdzie ŭžo siońnia.
21 lutaha — Mižnarodny dzień rodnaj movy. Śviata ŭstanaviła JUNIESKA ŭ 1999 hodzie ŭ pamiać pra trahiedyju 1952 hoda ŭ Banhładeš (na toj čas heta była častka Pakistana), kali zabili studentaŭ, jakija zmahalisia za toje, kab bienhalskaja mova stała dziaržaŭnaj. Hałoŭnaja ideja hetaha dnia — abaraniać moŭnuju raznastajnaść i padtrymlivać movy pad pahrozaj.
Z 2009 hoda JUNIESKA ŭklučyła biełaruskuju ŭ śpis moŭ, jakim pahražaje źniknieńnie.
Minsk
20 lutaha adbudziecca ahulnabiełaruskaja dyktoŭka ad Instytuta movaznaŭstva imia Jakuba Kołasa NAN Biełarusi. Afłajn jana projdzie ŭ Centralnaj navukovaj biblijatecy imia Jakuba Kołasa (vuł. Surhanava, 15). Taksama možna budzie dałučycca i anłajn — na sajcie «Kultura» Biełaruskaha radyjo (radiokultura.by) ci na chvali 102.9 FM.
U Litaraturnym muziei Maksima Bahdanoviča (vuł. Maksima Bahdanoviča, 7a) 21 lutaha a 16:00 projdzie moŭna-litaraturny kviz. Haściej čakajuć zahadki pa vieršach Alesia Razanava, frazieałahičny «Krakadził», litaraturnyja «piarevaratni», ryfmavanki i knižny abmien. Uvachod — 10 rubloŭ.
22 lutaha a 14:00 u Dziaržaŭnym muziei historyi biełaruskaj litaratury (vuł. Maksima Bahdanoviča, 13) płanujecca kuratarskaja ekskursija pa vystavie «Viasna ŭvosień» da 95‑hodździa Uładzimira Karatkieviča. Rodnuju movu prapanujuć hłybiej paznać praź litaraturu.
Nacyjanalny mastacki muziej ceły tydzień ładzić mierapryjemstvy da Dnia rodnaj movy (tut padrabiazny raskład). 19 lutaha, naprykład, budzie lekcyja «Minski i sibirski pieryjady žyćcia i tvorčaści Jana Damiela: novyja źviestki» (18:00). A 21 lutaha — sustreča z kurataram vystavy «Pierad krasoj tvajoj maŭčać» Kaciarynaj Kalankievič i mastačkaj Kryścinaj Mielnik-Subcelnaj, majstar-kłas pa alejnym žyvapisie, kancert POLIFONICA men i POLIFONICA kids «Hukańnie viasny». U niadzielu 22 lutaha a 14:00 — paetyčny batł ad studentaŭ fiłałahičnaha fakulteta Biełaruskaha dziaržaŭnaha ŭniviersiteta. Praŭda, tema dla Tydnia rodnaj movy niečakanaja — «Jasienin VS Majakoŭski» (na zaviaršeńnie raboty vystavy «Jasienin. Biaskoncaja lehienda»).
Brest
21 lutaha ŭ Bresckim teatry lalek (vuł. Lenina, 56) Dzień rodnaj movy adznačać, syhraŭšy śpiektakli na biełaruskaj «Pilipka i viedźma» i «Dzivak z Hančarnaj vulicy».
Hrodna
20 lutaha z 11:00 da 12:00 u Novym zamku (vuł. Zamkavaja, 22, čytalnaja zała) zapłanavana muziejnaja dyktoŭka, jakaja projdzie biaspłatna, ale kab trapić na jaje, nieabchodny papiaredni zapis: 71-86-88, +375 (29) 776-65-88.
Viciebsk
21 lutaha ŭ kancertnaj zali «Viciebsk» (pr. Frunze, 1) adbudziecca śviata «E.T.N.O.: enierhija tradycyj — spadčyna hramadstva». Padčas jaho projdzie dyktoŭka «Biełaruś — kraina miru», majstar-kłasy pa ramiostvach, narodnyja tancy, vystava «Žyvyja nitki tradycyj», navat znajomstva z movaj chindzi. Naprykancy prahramy čakajecca kancert. Kvitki — 15 rubloŭ.
Homiel
19 lutaha a 18:00 u Muziei historyi horada Homiela (Palaŭničy domik, vuł. Puškina, 32) adbudziecca muzyčny viečar. Kamierny skład simfaničnaha arkiestra vykanaje tvory Ihara Łučanka, Eduarda Chanka, Kanstancina Jelskaha i Michała Kazimira Radziviła. Jadnańnie ź biełaruskaj movaj adbudziecca praz movu muzyki.
Vilnia
21 lutaha a 17:00 u Domie nacyjanalnych supolnaściaŭ (Raugyklos g. 25) čakajecca kulturnaja impreza z muzykaj i paezijaj, siarod udzielnikaŭ jakoj Pavieł Sieviaryniec i kapeła «Ojra». Uvachod volny.
Varšava
22 lutaha z 13:00 da 16:00 u Biełaruskim moładzievym chabie (ul. Dożynkowa 6a) u Dzień rodnaj movy zładziać dziciačy fiestyval «Naš kirmaš». Naviedvalnikaŭ čakaje muzyka, sustreča ź piśmieńnikam Andrejem Skurko, teatralnaje čytańnie i prezientacyja «Patajemnaj spadčyny», majstar-kłasy, knižny kirmaš (Gutenberg, «Januškievič», byProsvet, Słowianka). Vystupić i Lavon Volski.
21 lutaha a 16:00 u kramie Vyraj (al. Armii Ludowej 12) taksama adbudziecca biełaruskaja dyktoŭka. Tekst budzie čytać Zianon Paźniak, a ŭdzielnikaŭ, što pakažuć najlepšyja vyniki, čakajuć pryzy.
Krakaŭ
U chabie Prastora.krk (ul. Mikołajska 4/6) u Dzień rodnaj movy adbudziecca sustreča ad kursaŭ «Mova Nanova», padčas jakoj budzie lekcyja Cimocha Akudoviča pra Radziviłaŭskuju mapu XVII stahodździa, dyktoŭka i moŭnaja praktyka, rozyhryš kopii mapy. Uvachod za danat.
Urocłaŭ
Supołka biełarusaŭ Urocłava ładzić anłajn-konkurs ese ad supołki biełarusaŭ. Temy — «Mova majho dziacinstva», «Słova, jakoje mianie ratuje» i inšyja. Pieramožcaŭ vybiraje hałasavańnie ŭ Instagram.
Kamientary