Źmitra Daškieviča sudziać u jaho adsutnaść za parušeńnie paradku previentyŭnaha nahladu

U sudzie Pieršamajskaha rajona Minska 30 studzienia pačałosia słuchańnie administratyŭnaj spravy byłoha palitviaźnia Źmitra Daškieviča, jaki abvinavačvajecca ŭ parušeńni paradku previentyŭnaha nahladu. Pasiadžeńnie viadzie sudździa Juryj Harbatoŭski.

Palityk abvinavačvajecca pa p.1 art.24 - 12 KaAP. Hety artykuł praduhledžvaje pakarańnie ŭ vyhladzie štrafu ŭ pamiery ad 6 da 10 bazavych vieličyń.

Abvinavačany ŭ sud nie źjaviŭsia, patłumačyŭšy heta zaniataściu na pracy. Akramia taho, na dumku Daškieviča, u sudach pracujuć ludzi, «jakija nie adnojčy fabrykavali spravy» i jakim jon nie ličyć patrebnym dakazvać svaju nievinavataść.

Sustaršynia mižnarodnaha hramadskaha abjadnańnia «Małady front» ( Čechija) Dźmitryj Daškievič atrymaŭ papiaredžańnie za parušeńnie praviłaŭ adbyćcia previentyŭnaha nahladu paśla taho, jak 19 śniežnia nie źjaviŭsia ŭ kryminalna-nahladnuju inśpiekcyju Pieršamajskaha RUUS, dzie pavinien adznačacca pieršy, treci i čaćviorty čaćvier kožnaha miesiaca.

Jak rastłumačyŭ Daškievič, jon prosta zabyŭsia pra toje, što treci čaćvier miesiaca vypaŭ na 19 śniežnia. Na nastupnuju ranicu jamu patelefanavaŭ inśpiektar z prapanovaj źjavicca ŭ RUUS, što Daškievič adrazu ž zrabiŭ, ale ŭ milicyi ŭ jaho dačynieńni skłali pratakoł ab parušeńni paradku previentyŭnaha nahladu.

Jak adznačyŭ palityk, u padobnych vypadkach (kali čałaviek adzin raz zabyŭsia pryjści ŭ milicyju, ale zrabiŭ heta na nastupny dzień) pratakoły, jak praviła, nie składajuć. Adnak inśpiektar skazaŭ Daškieviču, što skłaści hety pratakoł jamu zahadała načalstva.

Nahadajem, 28 žniŭnia minułaha hoda Daškievič vyjšaŭ na volu z haradzienskaj turmy № 1 paśla amal trochhadovaha źniavoleńnia. Jon byŭ aryštavany napiaredadni apošnich prezidenckich vybaraŭ, 18 śniežnia 2010 hoda, i asudžany spačatku za «asabliva złosnaje chulihanstva», a paśla za «złosnaje niepadparadkavańnie patrabavańniam administracyi papraŭčaj ustanovy». Pad previentyŭnym nahladam Daškievič pavinien znachodzicca na praciahu paŭhoda paśla vyzvaleńnia. Jamu zabaroniena pakidać miesca žycharstva z 20 da 6 hadzin.

6 listapada Daškievič byŭ zatrymany ŭ Minsku padčas akcyi «Maładoha frontu»: jaje ŭdzielniki źbirali podpisy minakoŭ za viartańnie staličnaj vulicy Lenina jaje histaryčnaj nazvy - Francyskanskaja. U toj ža dzień palityka asudzili za niepadparadkavańnie milicyi na troje sutak aryštu ŭ Centry izalacyi pravaparušalnikaŭ. Daškievič svajoj viny nie pryznaŭ, zajaviŭšy, što jaho asudzili na padstavie sfalsifikavanaha pratakołu, i rascaniŭ dziejańni ŭładaŭ jak «praciah kursu na pieraśled inšadumcaŭ».

5 śniežnia Daškievič byŭ papiaredžany ab mahčymym praciahu i ŭzmacnieńni previentyŭnaha nahladu ŭ vypadku «dalejšaha akazańnia supracivu supracoŭnikam milicyi».

• 0
• 0
• 0
• 0
• 0
• 0
• 0
• 0