Biełaruskija dalnabojščyki masava cikaviacca «pašpartami RR». Voś jak taki pašpart robicca

Tema afarmleńnia «pašparta RR» u apošnija miesiacy siarod biełaruskich dalnabojščykaŭ stała asabliva papularnaj. U pieršuju čarhu praz toje, što jon dazvalaje jeździć pa Biełarusi na mašynie ź jeŭrapiejskaj rehistracyjaj i pry niekatorych umovach uvozić jaje dla dalejšaj rehistracyi ŭ Biełarusi biez apłaty myta.

Kiroŭcy dzielacca dośviedam z kalehami, a niekatoryja błohiery-dalnabojščyki źbirajuć sotni tysiač prahladaŭ pa hetaj temie i navat hatovyja davać płatnyja kansultacyi pa afarmleńni «pašpartu RR».

«Nijakich pierakładaŭ i pracoŭnych damoŭ nie prasili. Zapłaciŭ 10 bazavych, 1,5 tydnia — i štamp u pašparcie», — piša adzin z tych, chto zrabiŭ užo sabie dakumient.

Mnohich cikavić, što tady rabić z majomaściu ŭ Biełarusi, kolki mašyn i jakich uvieźci dazvolać.

Što heta takoje?

Biełarusy, jakija majuć DNŽ u inšych krainach abo druhoje hramadzianstva, mohuć prajści peŭnuju administracyjnuju praceduru, jakuju ŭ narodzie nazyvajuć atrymańniem «pašparta RR».

Raniej biełaruskija hramadzianie, jakija aficyjna źjechali na PMŽ u inšuju krainu, atrymlivali pašpart admysłovaj sieryi RR. Apošnija niekalki hadoŭ pašparty sieryi RR nie vydajuć, zamiest hetaha staviać štampy ŭ zvyčajny pašpart.

Tym nie mienš, pracedura aficyjnaha adbyćcia na PMŽ i pastanoŭki na konsulski ŭlik dahetul nazyvajecca afarmleńniem «pašparta RR».

Kamu i navošta heta treba?

Čaściej za ŭsio «pašpart RR» robiać dla taho, kab mieć mahčymaść jeździć u Biełaruś na aŭto ź jeŭrapiejskaj rehistracyjaj na pravach zamiežnikaŭ — to-bok nie pakidajučy załoh (finharantyju) u pamiery 100% mytnaj pošliny za aŭto.

Biełaruskija dalnabojščyki ž robiać heta najpierš praz toje, što aŭtamabili ŭ Jeŭropie kaštujuć tańniej (asabliva ŭzrostavyja), a na jeŭrapiejskich numarach možna jeździć bieź jakich-niebudź abmiežavańniaŭ pa ŭsioj Jeŭropie.

Pavialičyć

Što jašče daje aficyjny adjezd na PMŽ?

Voś što źmianiaje atrymańnie «pašparta RR»:

• Mužčyn i vajennaabaviazanych žančyn z «pašpartam RR» zdymajuć z voinskaha ŭliku. Praz heta chłopcaŭ, jakija atrymali pašpart RR, pry dasiahnieńni 18 hadoŭ taksama nie pryzyvajuć na terminovuju słužbu.
• Aficyjna adbyŭšyja na PMŽ nie ličacca «darmajedami».
• Taki čałaviek nie abaviazany mieć prapisku ŭ Biełarusi, što zručna dla tych, chto nie maje svajho žytła, ale ŭsio adno musić šukać miesca dla rehistracyi.
• Trymalniki «pašparta RR» majuć šerah mytnych ilhot pry viartańni na pražyvańnie ŭ Biełaruś.

Reč u tym, što biełarusy, jakija aficyjna adbyli na PMŽ u inšyja krainy, pry viartańni na radzimu majuć prava ŭvozić zamiežnuju majomaść jak asabistyja rečy — to-bok biez apłaty mytnych pošlin.

Takim čynam dalnabojščyki niaredka karystajucca takoj praceduraj nie tolki dziela taho, kab jeździć na aŭto z polskaj ci litoŭskaj rehistracyjaj, ale i kab paśla pryvieźci mašynu ŭ Biełaruś i pastavić užo na biełaruski ŭlik.

Praŭda, dla hetaha treba, kab mašyna za miažoj była aformlena na vas nie mienš čym 6 miesiacaŭ da viartańnia z PMŽ na radzimu.

Ale śpis rečaŭ, jakija možna takim čynam pryvieści ŭ Biełaruś biez spłaty myta, mašynaj nie abmiažoŭvajecca. U takim ža paradku možna pryvieźci televizar, prałku, chaładzilnik i hetak dalej pa śpisie.

I jašče adzin važny momant dla tych, chto sapraŭdy viartajecca nazad, a nie robić «pašpart RR» dziela aŭto — taki čałaviek moža pravozić svaje rečy biez abmiežavańniaŭ pa košcie i vazie.

U inšym vypadku čałaviek, jaki nie staŭ na konsulski ŭlik za miažoj, moža choć 20 hadoŭ pražyć u inšaj krainie, ale ŭvozić asabistyja rečy ŭ Biełaruś zmoža tolki na standartnych umovach, jak i zvyčajnyja padarožniki.

Minusy taksama jość

Aproč peŭnych pieravah, uładalniki tak zvanych «pašpartoŭ RR» atrymlivajuć šerah minusaŭ. 

Praz toje, što ŭ čałavieka niama biełaruskaj prapiski jon nie zmoža pradavać nieruchomaść ci aŭto, nie zrabiŭšy časovuju rehistracyju. Pry hetym być časova zarehistravanym, kali maješ «pašpart RR», možna nie bolš za 6 miesiacaŭ u hodzie. 

Inšy bolš važny minus — takija ludzi stračvajuć prava biaspłatna atrymlivać miedycynskaje absłuhoŭvańnie ŭ Biełarusi. 

Pavialičyć

Jak atrymać «pašpart RR»

Jašče raz akreślim, što novy pašpart u konsulstvie nie vydaduć — stavicca tolki štamp u isnujučy (tamu vyrašyć prablemu z pašpartam, termin dziejańnia jakoha skančvajecca, heta nie dapamoža).

Aficyjna adbyć na PMŽ možna dvuma sposabami. Pieršy, bolš chutki i tanny, — rabić heta ŭ Biełarusi.

Dla hetaha treba iści ŭ adździeł pa hramadzianstvie i mihracyi (u narodzie — pašpartny stoł). Tam zajaŭniku dajuć pamiatku, što treba zrabić.

Pa-pieršaje — apłacić pošlinu ŭ pamiery 10 bazavych vieličyń (dzieciam da 14 hadoŭ — biaspłatna). Taksama spatrebiacca sam pašpart, paśviedčańnie ab naradžeńni, ab šlubie, ab naradžeńni dziaciej da 18 hadoŭ, vajskovy bilet (pry jaho najaŭnaści), ankieta, paviedamleńnie ab najaŭnaści zamiežnaha dakumienta i papka-sšyvalnik.

Dalej treba čakać miesiac, pakul pa vas praviaduć pravierku na pradmiet najaŭnaści zapazyčanaściej. Taksama nielha mieć adkrytaje IP.

U vypadku stanoŭčaha vyniku pravierki vam u pašpart pastaviać štamp ab anulavańni rehistracyi pa miescy žycharstva i štamp ab dazvole na vyjezd na PMŽ.

Apošni, užo treci štamp — ab pastanoŭcy na pastajanny konsulski ŭlik — treba stavić u pašpart užo za miažoj. Košt pasłuhi 10 jeŭra.

Pavialičyć

Prajści praceduru adbyćcia na PMŽ možna i z-za miažy. Praŭda, heta našmat daŭžej i daražej.

Kali, naprykład, brać Polšču i Litvu, to zapisacca ŭ ambasadu možna pryblizna praz 10 miesiacaŭ. Sama pracedura kaštuje 200 jeŭra zamiest 10 bazavych, a termin razhladu zajmaje da 4 miesiacaŭ zamiest 1 miesiaca ŭ Biełarusi. To-bok ahułam spatrebicca bolš za adzin hod.

Z takim naboram štampaŭ možna jeździć u Biełaruś na aŭto z zamiežnaj rehistracyjaj, a pa viartańni nazad (nie raniej čym praz 6 miesiacaŭ) uvozić u Biełaruś asabistyja rečy (u tym liku aŭto) biez apłaty mytnych pošlin i abmiežavańniaŭ pa košcie i vazie.

• 12
• 3
• 1
• 11
• 3
• 0
• 1
• 0