Staršynioj PEN-Centra pierabrany Chadanovič, premijami imia Bahuševiča i Adamoviča ŭhanaravany Trafimčyk i Niaklajeŭ

28 lutaha adbyŭsia čarhovy Ahulny schod Biełaruskaha PEN-centra. Upieršyniu ŭ historyi PENa jaho pryniała hałereja partała TUT.BY.

Staršyniom PENa pieraabrali paeta Andreja Chadanoviča, jahonymi namieśnikami stali Pavieł Ancipaŭ, Hanna Jankuta i Jula Cimafiejeva.

Jarkim momantam schodu stała ŭručeńnie premij imia Alesia Adamoviča i imia Franciška Bahuševiča.

Premijaj imia Alesia Adamoviča, jakaja prysudžajecca za najbolš jarkuju publicystyčnuju knihu papiaredniaha hoda, byŭ uhanaravany Uładzimir Niaklajeŭ. Tak byŭ adznačany jahony miemuarny cykł «Znaki prypynku», jaki letaś byŭ apublikavany ŭ vydaviectvie «Limaryus» z kamientarami Siarhieja Šaprana.

Tradycyjnaja Premija Franciška Bahuševiča za najbolš vartyja histaryčnyja daśledavańni, jakija abudžajuć nacyjanalnuju śviadomaść, była prysudžanaja Anatolu Trafimčyku za jahonuju knihu «1939 hod i Biełaruś: zabytaja vajna».

Daśledavańnie łaŭreata pabačyła śviet u novaha biełaruskaha vydaŭca histaryčnaj litaratury – Andreja Januškieviča. Papularnaja kniha pra 1939 hod, ale napisanaja z punktu hledžańnia biełarusacentryčnaha histaryjohrafa.

Na schodzie Biełaruskaha PENa byŭ pradstaŭleny i absalutna novy prajekt: «Kniha hodu».

Jaje buduć abirać usie achvotnyja piśmieńniki hałasavańniem na sajcie arhanizacyi, u naminacyjach «Paezija», «Proza», «Dziciačaja litaratura». Pieršaje ŭručeńnie simvaličnaj «Knihi hodu» adbudziecca sioleta ŭ krasaviku.

Peŭnyja pytańni vyklikaŭ punkt pałažeńnia pra roŭnaść moŭ, jakimi karystajucca biełaruskija piśmieńniki. «Tym nie mienš pazicyja PEN-centra, zamacavanaja ŭ statucie premii, dastatkova prazrystaja: i ruskamoŭnyja, i biełaruskamoŭnyja aŭtary majuć roŭnyja pravy ŭ litaratarskim spabornictvie. Nichto nie źbirajecca zabyvać pra niaprostaje stanovišča biełaruskaj movy ŭ hramadstvie, ale i ŭcisk ruskamoŭnych paetaŭ i prazaikaŭ byŭ by zusim niekarektnym krokam, — havorycca ŭ pres-relizie PEN-Centra. — Tym bolš ruskamoŭnyja aŭtary ŭ Biełarusi naahuł nie majuć ułasnych litaraturnych uznaharodaŭ. Pastulujučy raŭnapraŭje movaŭ, pierš za ŭsio litaraturnych movaŭ, Biełaruski PEN-centr źviartaje ŭvahu na peŭnuju dyskryminacyju, jakuju varta pieraadolvać».

Vielmi zapatrabavanaj budzie inšaja inicyjatyva arhanizacyi — mahčymaść dla maładych litarataraŭ atrymać stypiendyju na dvuchtydniovaje pražyvańnie i pracu ŭ Vilni («Rezidencyja maładoha litaratara»). Dziakujučy Rezidencyi maładoha litaratara 7 maładych aŭtaraŭ zmahli ŭ 2014 hodzie papracavać u «kryvickaj Miecy». 

• 0
• 0
• 0
• 0
• 0
• 0
• 0
• 0