Dyrektarka «Biełsata» zaklikaje šukać ratavańnie dla Biełarusi ŭ histaryčnych karaniach
Dyrektar polskaha spadarožnikavaha telekanała «Biełsat», jaki viaščaje na Biełaruś, Ahnieška Ramašeŭska-Huzy ŭpieršyniu za 10 hadoŭ zmahła atrymać dazvoł na ŭjezd u Biełaruś i ŭžo niekalki dzion padarožničaje pa krainie, sustrakajučysia ź siabrami, jakich nie bačyła doŭhi čas.
U intervju BiełaPAN jana paviedamiła, što paśpieła naviedać Hrodna, Pinsk, Niaśviž i Minsk, napieradzie jaje čakaje ekskursija pa Mahilovie. «Siabry zapłanavali dla mianie vielmi vialiki maršrut pajezdki. Kali budu jechać nazad, zajedu ŭ Mir, pahladzieć na pomniki, słavutaści, ź ludźmi parazmaŭlać, prosta adčuć, čym ciapier dychajuć biełarusy», — zaznačyła Ramašeŭska-Huzy.
Dla dyrektara telekanała «Biełsat» naviedvać Biełaruś paśla takoha pierapynku vielmi važna i cikava, bo «možna čytać naviny i dumać, što ty ŭsio viedaješ pra krainu, ale pakul nie pahladziš svaimi vačyma, jak stali žyć ludzi, jak jany siabie pavodziać, pa-sapraŭdnamu zrazumieć, što tut adbyvajecca, niemahčyma».
«Ja vielmi rada pryjezdu. Heta vialikaja radaść dla čałavieka sustreć svaich siabroŭ paśla dziesiaci hadoŭ pierapynku. Ja ŭžo kazała, što vielmi ŭdziačnaja spadaru Łukašenku za toje, što jon mianie ŭpuściŭ. Kali b jon mianie nie trymaŭ dziesiać hadoŭ, ja b takoj udziačnaj nie była», — skazała jana.
Razvažajučy ab tym, čamu pradstaŭniki biełaruskaj ułady ŭsio ž vyrašyli vydać joj ujaznuju vizu, Ramašeŭska-Huzy vykazała mierkavańnie, što heta moža być źviazana z čarhovym vitkom libieralizacyi ŭ Biełarusi pierad prezidenckimi vybarami.
«Niemahčyma, kab mianie prosta prahledzieli, bo raniej u konsulstvie Biełarusi ŭ Varšavie mnie admaŭlali dva abo try razy, — skazała dyrektar «Biełsata». — Chutčej, heta vynik niejkaj libieralizacyi. Chtości prosta nie zachacieŭ rabić skandał, padumaŭ, što ničoha strašnaha nie zdarycca — pryjedzie, pahladzić, ź ludźmi pahutaryć i źjedzie. I pravilna padumali, nu što ja tut zmahu zrabić, užo dakładna nie revalucyju».
Pavodle jaje słoŭ, hety vitok libieralizacyi «Biełsat» vykarystaje taksama dla taho, kab u čarhovy raz pasprabavać akredytavać u Biełarusi svaich karespandentaŭ. Tym nie mienš, nijakaj upeŭnienaści ŭ tym, što hetaje pradpryjemstva budzie paśpiachovym, u jaje niama, bo «treba razumieć, što hetaja sistema niepradkazalnaja».
U listapadzie 2012 hoda telekanału skaracili finansavańnie, i «Biełsat» byŭ vymušany šukać dadatkovych sponsaraŭ, kab viarnuć raniejšy abjom viaščańnia. Praź niekatory čas telekanału ŭdałosia adšukać dla hetaha srodki. Adnak siońnia «Biełsat» znoŭ na parozie ekanamičnych ciažkaściaŭ.
«Apošnija dva hady finansavyja spravy ŭ kanała išli dobra, bo byli donary sa Šviecyi, Narviehii, inšych krain Jeŭropy, — skazała Ramašeŭska-Huzy. — Ale siońnia mnie znoŭ prychodzicca niepakoicca, bo ŭ nas kiepskaja infarmacyja ź Jeŭrakamisii. Pakul ja nie razumieju, što da čaho, budu raźbiracca, kali viarnusia ŭ Varšavu. Chtości nie razumieje, što ŭ taki čas, u jaki my ciapier žyviem, naša infarmacyja vielmi važnaja z ulikam zasilla rasijskaj prapahandy».
Na dumku dyrektara «Biełsata», dla rasijskaha infarmacyjnaha ŭpłyvu Biełaruś vielmi važnaja i ŭraźlivaja, u hetym płanie jaje ŭ niejkim sensie možna paraŭnać z Danbasam, bo i tam, i tam zastajecca vysokim uzrovień savietyzacyi.
«Ale surjoznaje adroźnieńnie — heta toje, što ŭ Biełarusi jość karani, jakija mohuć vyratavać samaśviadomaść jaje žycharoŭ, a ŭ žycharoŭ Danbasa hetaha niama», — skazała Ramašeŭska-Huzy, paraiŭšy šukać ratavańnie ad Rasii mienavita ŭ biełaruskich histaryčnych karaniach.
Ahnieška Ramašeŭska-Huzy ŭ śniežni 2005 hoda była departavanaja ź Biełarusi jak niepažadanaja piersona za svaju prafiesijnuju dziejnaść.
Kamientary