Skarb, znojdzieny ŭ rajonie Rakava padčas archieałahičnych raźviedak na miescy budučaha budaŭnictva 2-j Minskaj kalcavoj aŭtamabilnaj darohi archieołahami instytuta historyi Nacyjanalnaj akademii navuk Biełarusi, prajšoŭ pieršasnaje vyznačeńnie, paviedamlaje minsknews.by.
«Znojdzieny jon byŭ u kancy pracoŭnaha dnia, — kaža navukovy supracoŭnik adździeła archieałohii pieršabytnaha hramadstva instytuta historyi NAN Biełarusi Zoja Charytanovič. — My daśledavali razaranaje pole, kali natyknulisia na pieršyja maniety».
Jany byli rassypanyja na terytoryi 50 na 30 m. Usiaho było znojdziena 233 miednyja solidy, viadomych taksama jak baracinki.
Pieršasnaje vyznačeńnie skarbu praviała navukovy supracoŭnik adździeła śpiecyjalnych histaryčnych navuk i infarmacyjna-analityčnaj pracy Instytuta historyi NAN Biełarusi Julija Łatuškova. Maniety hetaha skarbu adroźnivajucca dobraj zachavanaściu. Ustanoŭlena, što samaja rańniaja ź ich vypuščanaja ŭ 1660 hodzie, a samaja poźniaja — u 1667-m. Baracinki čakanki jak VKŁ, tak i Polščy. Chutčej za ŭsio, heta zvyčajny kašalok, jaki zhubili nie raniej za 1667 hod. Jon pralažaŭ u ziamli minimum 348 hadoŭ. Padčas sielskahaspadarčych rabot maniety raściahnuli płuham pa vialikaj płoščy pola.
Skarby baracinak — adny z samych raspaŭsiudžanych na terytoryi sučasnaj Biełarusi. Hetyja miednyja maniety vypuskalisia ŭ 1659-1668 hh. Usiaho było vypuščana bolš za miljard baracinak. Ich realny košt pa vazie mietału składaŭ usiaho 15% ad aficyjnaha, naminalnaha. Manieta čakaniłasia ŭ ciažkich ekanamičnych umovach, vyklikanych vajnoj Rečy Paspalitaj sa Šviecyjaj i Rasijaj.
Usiaho ž za čas praviadzieńnia daśledavańniaŭ, źviazanych z budaŭnictvam MKAD-2, navukoŭcy znajšli bolš za 20 archieałahičnych pomnikaŭ Siaredniaviečča. Pra heta paviedamiŭ namieśnik dyrektara Instytuta historyi NAN Biełarusi Vadzim Łakiza, pieradaje BiełTA.
«U kancy maja našy śpiecyjalisty prystupili da abśledavańnia druhoj čarhi budaŭnictva MKAD-2 na ŭčastku ad trasy Minsk—Hrodna da trasy Minsk—Brest. Častka našych zadač pa abśledavańniu hetaha 40-kiłamietrovaha ŭčastka ŭžo vykananaja. My znajšli i nanieśli na karty bolš za 10 unikalnych archieałahičnych abjektaŭ, pomnikaŭ epochi Siaredniaviečča. Usiaho ž ich znojdziena bolš za 20», — skazaŭ jon.
Vadzim Łakiza padkreśliŭ, što nazvy nasielenych punktaŭ, dzie jany byli vyjaŭlenyja, pakul nie vydajucca, kab paźbiehnuć «čornych» kapalnikaŭ.
«Kančatkovaje abśledavańnie hetaj terytoryi pačniecca ŭ druhoj pałovie žniŭnia, kali zavieršycca ŭborka zbožžavych i pačniecca pasiaŭnaja kampanija. Tam pali, i ciapier składana pravieści detalovaje abśledavańnie. Da kastryčnika my pavinny padrychtavać spravazdaču dla «Biełhipradar», u jakim adznačym, ci treba niejkim čynam mianiać prajekt budaŭnictva aŭtadarohi, kab abaranić archieałahičnyja pomniki», — rastłumačyŭ jon. Pakul, pa słovach navukoŭca, takoj nieabchodnaści niama.
Namieśnik dyrektara Instytuta historyi NAN Biełarusi taksama paviedamiŭ, što na hetaj terytoryi byli znojdzienyja pomniki nie tolki časoŭ Siaredniaviečča, ale i pradmiety pieršabytnaha času (kramianiovyja pryłady pracy) i mižvajennaha času XX stahodździa. «Vučonyja znajšli ahniavy punkt, usypany kulami, dzie zastavalisia asabistyja rečy, u tym liku i zapalnička. Kamu jany mahli naležać, my i pasprabujem vyśvietlić», — adznačyŭ jon.
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii12
Kamientary