Brescki handbolny kłub imia Miaškova vyjhraŭ mižnarodny handbolny turnir «Kubak «Biełhazprambanka».
Vośmy mižnarodny turnir «Kubak «Biełhazprambanka» prachodziŭ u bresckim spartkompleksie «Viktoryja» 21-23 žniŭnia. Na hety raz akramia čempijona Biełarusi — BHK imia Miaškova — za hałoŭny pryz u ramkach turniru zmahalisia druhi i treci kłuby Polščy płockaja «Visła» i «Azot» z puła i bronzavy pryzior čempijanatu Rasii — «Niava» z Sankt-Pieciarburha.
U vyniku ŭ vyrašalnym matčy sustrelisia BHK imia Miaškova i «Visła», jakija atrymali pa dźvie pieramohi ŭ startavych matčach turniru. Brestaŭčanie prajhrali ź likam 12:13 pieršy tajm, ale vypravili svajo stanovišča da finalnaj sirenie, vyjhraŭšy nie tolki matč ź likam 24:22, ale i ŭvieś turnir. U vyrašalnym matčy hały ŭ BHK zakidvali: Šyłovič — 5, Stojkavič, Ciumiencaŭ — pa 4, Nikulenkaŭ — 3, Aćman, Šumak — pa 2, Vukič, Razhar, Rutenka, Kryštapans — pa 1.
U matčy za treciaje miesca «Azot» ź likam 25:21 abhulaŭ «Niavu». Vynikovaje stanovišča kamand: BHK imia Miaškova — 6 ačkoŭ, «Visła» — 4, «Azot» — 2, «Niava» — 0.
BHK u čaćviorty raz vyjhraŭ Kubak «Biełhazprambanka». Praŭda, apošni pośpiech u hetym turniry ŭ bieraściejcaŭ zdaryŭsia piać hadoŭ tamu — u 2010 hodzie. Da jaho BHK pryvioŭ Siarhiej Biabieška, jaki vyjhraŭ Kubak «Biełhazprambanka» i ŭ minułym hodzie, tolki — z zaparožskim «Matoram». Akramia BHK pa razie ŭ turniry pieramahali «Visła», francuzski «Dziunkierk», makiedonski «Vardar» i ŭkrainski «Mator».
Kamientary