Padčas druhoha etapa sumiesnych z Rasijaj vučeńniaŭ «Centr-2015» u Aktau na paŭdniovym zachadzie Kazachstana patanuli čaćviora vajennasłužačych terminovaj słužby. Pra heta 18 vieraśnia paviedamiła Tengrinews.kz sa spasyłkaj na pres-słužbu ministerstva abarony Kazachstana.
Incydent adbyŭsia padčas prachodžańnia epizodu «vysadka marskoha desanta i błakavańnie płacdarmu» ŭ piaci kiłamietrach ad palihona «Ajmaša». U mora vyjšli šeść adzinak BTR-80 i 52 vajskoŭcy.
Pieraadoleŭšy kala 150 mietraŭ pa mory, čatyry adzinki BTR-80 patanuli z-za mocnaha paryvu vietru i vysokich chvalaŭ.
Dźvie adzinki BTR vyjšli na bierah.
Zahinuli čaćviora vajennasłužačych terminovaj słužby — traim ź ich było pa 19 hadoŭ, čaćviortamu — 23.
Ministr abarony Kazachstana Imanhali Tasmahambietaŭ daručyŭ terminova vyśvietlić padrabiaznaści i pryčyny. Pa vynikach papiaredniaha rasśledavańnia ministram pryniata rašeńnie ab adchileńni ad pasady čatyroch vajenačalnikaŭ. Dalejšy ich los vyznačyć sud.
«Pieršapačatkovyja vysnovy pakazvajuć, što dadzieny incydent adbyŭsia pa pryčynie pryniaćcia niasłušnaha rašeńnia pry adpracoŭcy praktyčnaha epizodu vysadki marskoha desantu pry adsutnaści desantna-vysadačnych srodkaŭ», — havorycca ŭ raspaŭsiudžanym paviedamleńni.
Sumiesnyja vučeńni Rasii i Kazachstana pačalisia 14 vieraśnia. Pavodle lehiendy manieŭraŭ, rasijskija i kazachstanskija vajennyja pavinny praduchilić mižnarodny kanflikt i niejtralizavać ŭzbrojenyja farmavańni na centralnaazijackim napramku.
Usiaho ŭ vučeńniach zadziejničany bolš za 95 tysiač vajskoŭcaŭ, a taksama bolš za 7 tysiač adzinak ŭzbrajeńnia i vajennaj techniki.
Kamientary