Z kastryčnika ŭ Litvie ŭstupili ŭ siłu papraŭki, jakija dazvalajuć karać retranślataraŭ za prapahandu vajny abo zakliki da źmieny kanstytucyjnaha ładu.
Parłamient krainy pryniaŭ hetyja papraŭki viasnoj. Uniasieńnie źmienaŭ u Zakon ab infarmavańni hramadstva inicyjavała prezident Dala Hrybaŭskajcie, arhumientujučy nieabchodnaściu baraćby z varožaj prapahandaj. Papraŭki ŭstanaŭlivajuć adkaznaść za źmiest prahram retranślatara niezaležna ad miesca rehistracyi.
Štraf za za prapahandu vajny, zakliki źmianić kanstytucyjny ład i pakvapicca na suvierenitet krainy moža dasiahać 3% hadavoha dachodu. Prezident D. Hrybaŭskajcie tłumačyła prapanovu pryniać takija papraŭki tym, što Litva «ciapier žyvie va ŭmovach infarmacyjnaj vajny» i nieabchodnaściu baraćby z varožaj prapahandaj.
Prychilniki papravak u sojmie prytrymlivalisia pazicyi, što heta budzie naležny adkaz na rasiejskuju prapahandu, ale byli i krytyki, jakija kazali, što heta — uviadzieńnie cenzury. Zakon taksama zabaraniaje na hod dziarždatacyi ŚMI, jakija buduć publikavać prapahandu ŭ padtrymku vajny i zakliki źmianić kanstytucyjny ład, Kamisija pa radyjo- i televiaščańni zmoža prymać apieratyŭnyja miery suprać takich ŚMI. U tłumačalnym liście z papraŭkami havaryłasia, što rasiejskija teleprahramy, u jakich demanstrujecca prapahanda, pastajanna hladziać 15% ci 400 tys. žycharoŭ Litvy.
Kamientary