Siońnia na «Barysaŭ-Arenie» projdzie matč 3-ha tura hrupavoha raŭnda Lihi čempijonaŭ BATE — «Barsiełona». Pačatak hulni ŭ 21:45. Jaho budzie tranślavać «Biełaruś-2», a taksama jaho možna pahladzieć anłajn na sajcie tvr.by.
Cikava, što ŭ dvuch pieršych matčach hrupavoha turniru BATE zabiŭ bolej miačoŭ za «Barsiełonu». Barysaŭski kłub u pieršaj hulni prajhraŭ «Bajeru» — 1:4, ale vyjhraŭ u «Romy» ź likam 3:2, h.zn. zabiŭ čatyry miačy. U toj čas katałoncy startavali ź ničyi z «Romaj» (1:1) i pieramahli «Bajer» (2:1). Praŭda, čatyry hady tamu kamandy sustrakalisia ŭ Minsku i sinie-hranatavyja razhramili BATE ź likam 5:0, a Piep Hvardyjoła ŭparta na pres-kanfierencyjaj pramaŭlaŭ pa-katałonsku.
Hałoŭny trenier «Barsiełony» Łuis Enrykie na pieradmatčavaj pres-kanfierencyi ŭ Minsku prakamientavaŭ, čamu kamanda apošnim časam šmat prapuskaje: «Sprava nie tolki ŭ abaronie, ale i ŭ dziejańniach ŭsioj kamandy. Apošnija parazy byli vypadkovyja. Supiernikam, liču, šancavała. U dalejšym my praciahniem pracavać pa naładžanaj schiemie».
«My biarem u raźlik hulniu BATE z «Romaj». Pieršy tajm u toj sustrečy byŭ vielmi pakazalny. My hatovyja da ciažkaściaŭ», dadaŭ jon.
U hateli «Reniesans», dzie pasialilisia katałoncy, viečaram u paniadziełak sabraŭsia natoŭp zaŭziataraŭ, Tribuna.com
DAI, darečy, rekamiendavała zaŭziataram karystacca trasaj M-1, abo uvohule hramadskim transpartam.
Što da nadvorja, to ŭviečary ŭ Barysavie budzie +4—6 hradusaŭ ciapła, pad noč słupok termomietra apuścicca da +2, ale źjavicca paryvisty viecier.
Kamientary