Pradprymalniki minskaha Červieńskaha rynku, jakija handlujuć tavarami lehprama, majuć namier masava prypynić svaju dziejnaść z 1 studzienia 2016 hoda z-za patrabavańniaŭ techrehłamientu Mytnaha sajuza «Ab biaśpiecy pradukcyi lohkaj pramysłovaści». Schod IP, pryśviečany hetamu pytańniu, adbyŭsia 25 listapada na rynku.
Pradprymalniki napisali apaviaščeńni ŭ adras administracyi rynku pra namier spynić z pačatku hoda arandavać płoščy. Jak paviedamiŭ BiełaPAN člen savieta pradprymalnikaŭ rynku, aktyvist RHA «Pierśpiektyva» Vasil Baranoŭski, zajavy ŭžo padali bolš jak 70 IP, jakija handlujuć abutkam i adzieńniem. Jany heta zrabili zahadzia, pakolki pavinny apaviaścić ab praciahu ci niepraciahu arendy nie paźniej čym za miesiac da zakančeńnia jaje terminu, a płacić za pieryjad, u jakim, chutčej za ŭsio, užo nie buduć pracavać, nie žadajuć, rastłumačyŭ Baranoŭski.
«Ludzi našy pracujuć hałoŭnym čynam z Maskvoj, a tam, pa sutnaści, roźničny handal, aficyjnych dakumientaŭ na tavar nichto nikomu nie daje, a kali dajuć — uźnikajuć prablemy: pryznačajecca sustrečnaja pravierka ŭ Rasii pa linii MPZ, i pradaŭcy, jak praviła, admaŭlajucca ad svaich ža dakumientaŭ, tamu što jany nie majuć prava pradavać pradukcyju za miažu ŭ roźnicu», — adznačyŭ pradprymalnik.
«Na radzie, dzie ja handluju, z 16 čałaviek tolki ŭ adnaho jość usie dakumienty, poŭny kamplekt ź siertyfikatami, usie astatnija nie mohuć ich atrymać, tamu što voziać adzieńnie i abutak maleńkimi partyjami», — skazaŭ Baranoŭski.
Zhodna z ukazam ad 16 maja 2014 hoda № 222 «Ab rehulavańni pradprymalnickaj dziejnaści i realizacyi tavaraŭ indyvidualnymi pradprymalnikami i inšymi fizičnymi asobami», 1 sakavika 2015 hoda skončyŭsia termin, kali IP mahli realizavać apisanyja reštki pradukcyi lehprama, uviezienaj z krain Mytnaha sajuza biez dakumientaŭ, jakija paćviardžajuć nabyćcio i pastupleńnie hetych tavaraŭ. Paśla sustrečy Alaksandra Łukašenki z pradprymalnikami handlovaha centra «Ekspabieł» 17 sakavika termin realizacyi tavaraŭ biez dakumientaŭ pradoŭžyli da 1 studzienia 2016 hoda — pavodle jaho słoŭ, u apošni raz.
16 listapada, vystupajučy na V Mižnarodnym forumie pradprymalnictva ŭ Minsku, ministr ekanomiki Uładzimir Zinoŭski zajaviŭ, što dyskusija ab siertyfikatach na tavary lehprama zavieršanaja. «My patracili šmat tydniaŭ, abmiarkoŭvajučy prablemu siertyfikataŭ na tavary lehprama. Usie patrabavańni biźniesu zvodziacca da taho, što treba viarnucca ŭ 1990-ja hady», — skazaŭ ministr, udakładniŭšy, što ŭviadzieńnie siertyfikacyi pradukcyi źjaŭlajecca abarončaj mieraj rynku JEAES.
Kamientary