Ab farmavańni novaj palityčnaj adzinki paviedamiŭ u interviju českamu pradstaŭnictvu rasiejskaha dziaržaŭnaha ahienctva «Sputnik» jaje lider Iržy Vivadził. Palityčny ruch (ci navat partyja), pavodle jaho słoŭ, stvarajecca na asnovie niefarmalnaj struktury «Siabry Rasiei ŭ Českaj Respublicy», jakaja źjaviłasia ŭ sakaviku 2015 jak hrupa ŭ Facebook.
Iržy Vivadził — viadomy ŭ Čechii juryst i palityk, u minułym — deputat českaha parlamentu, senatar, namieśnik ministra justycyi Českaj respubliki ŭ 2005—2006 hadach i sudździa Viarchoŭnaha administracyjnaha suda ŭ toj ža pieryjad.
Pavodle Vivadziła, šturškom da pieratvareńnia niefarmalnaj struktury ŭ palityčnuju stała niadaŭni praciah krainami zachadu sankcyj suprać Rasiei. Meta ruchu — stvaryć «krytyčnuju alternatyvu» partyjam.
«My pierakananyja, što za čverć stahodździa, jakija adździalajuć nas ad 1989 hoda, lehkadumny drejf u bok Zachadu zavioŭ nas u pastku. My stali saŭdzielnikami złačynstvaŭ u Iraku, Libii i Syryi, a mienavita hetyja kanflikty — pryčyna šmatmiljonnaj mihracyi, jakaja achapiła siońnia Eŭropu».
U interviju Iržy Vivadził vykazvaje salidarnaść ź ciapierašnim prezydentam Čechii Miłašam Zemanam, jaki nie vałodaje, zhodna z českaj Kanstytucyjaj, surjoznymi paŭnamoctvami, adnak bliskuča vałodaje antyzachodniaj rytorykaj. U kaladnym zvarocie da naroda Zeman, u pryvatnaści, nazvaŭ masavuju mihracyju apošniaha hoda «splanavanym uvarvańniem».
Siarod blizkich jamu suśvietnych palitykaŭ Vivadził nazvaŭ lidera «Nacyjanalnaha frontu» Francyi Maryn Lo Pien, byłoha premjera Hrecyi Aleksisa Cyprasa i amerykanskaha respublikanskaha palityka Donalda Trampa (usich ich ličać «siabrami Rasiei»). Asnoŭnaja palityčnaja teza Vivadziła — nieabchodnaść baraćby z «panavańniem ZŠA ŭ śviecie».
Pieraadoleć «amerykanskuju hiehiemoniju», na dumku Vivadziła, moža tolki ciapierašni prezydent Rasiei ŭ supracy z Kitajem abo Indyjaj.
Dla taho, kab padać dakumenty na rehistracyju, prapucinski ruch u Čechii pavinien sabrać tysiaču podpisaŭ. Pa finansavańnie svajoj dziejnaści Iržy Vivadził planuje źviarnucca da hramadzian Rasiei. Na jaho dumku, rasiejcam budzie vyhadna, kali Čechija stanie «mostam pamiž Uschodam i Zachadam».
Prarasiejskija partyi ŭžo isnujuć u niekalkich krainach Eŭropy. U pryvatnaści, u Vialikabrytanii stvoranaja partyja «Za Rasieju» — «dla abarony intaresaŭ ruskich i ruskamoŭnaha nasielnictva na terytoryi Vialikabrytanii». A ŭ susiedniaj z Čechijaj Słavaččynie na vybary 2016 idzie prarasiejskaja kaalicyja «Advaha».
Kamientary