Niekatoryja biełaruski iduć u surahatnyja mamy. Kolki za heta płaciać i chto z žančyn na heta hatovy?

Vyhladaje, što dla niekatorych žančyn surahatnaje maciarynstva — sapraŭdy sposab vypravić ciažkuju finansavuju situacyju. Inakš nie patłumačyć, čamu ŭ niekatorych abjavach z prapanovaj takich pasłuh staić paznaka «terminova».

Naprykład, voś hetaja žančyna choča zaciažaryć jak maha chutčej:

«Hatovaja da prahramy na bližejšy čas, zdaroŭje dobraje, uchvalena repraduktołaham […] Kali vam patrebnaja adkaznaja, prystojnaja surmama, ź jakoj vy kamfortna projdziecie ŭsiu ciažarnaść (luty-sakavik), pišycie, budu rada vam dapamahčy».

Žančyna prosić hanarar pamieram 2,4 miljona rasijskich rubloŭ (30 tysiač dalaraŭ). Kab jaje prapanovu dakładna pabačyli, žančyna pasprabavała publikavać adpaviednyja abjavy štodzień.

«My — maładaja para, jakaja maryć pra dzicia, šukajem dobruju, zdarovuju i adkaznuju dziaŭčynu, hatovuju stać surahatnaj mamaj dla našaj siamji. Dla nas heta vielmi važny i asensavany krok, tamu my šukajem čałavieka, jaki padzielić našu radaść i dapamoža ažyćciavić maru», — tak pačynajecca inšaja abjava.

Hetyja baćki hatovyja zapłacić surahatnaj maci 1,5 miljona rasijskich rubloŭ (kala 19 000 dalaraŭ). Kali ŭdasca zaciažaryć dvajniatami, da sumy dadaduć jašče 300 tysiač rasijskich rubloŭ (kala 3700 dalaraŭ). Akramia hetaha, žančynie kampiensujuć usie vydatki, źviazanyja ź ciažarnaściu — naprykład, lekavańnie, charčavańnie, adzieńnie i transpart, dapamohuć z padtrymkaj psichołaha i doktara.

Uzamien ad jaje chočuć nie tolki być zdarovaj, ale i kab jana mieła chacia b adno zdarovaje dzicia. I ŭ dadatak kab nie mieła sudzimaściaŭ.

Jość i pary, jakija prapanujuć za ciažarnaść mienšyja hanarary. Naprykład, para ź Minska hatovaja zapłacić surahatnaj maci 26 tysiač biełaruskich rubloŭ, pry hetym u abjavie niama infarmacyi pra pakryćcio vydatkaŭ, źviazanych ź ciažarnaściu.

Zvyčajna ŭ surahatnyja mamy biaruć žančyn uzrostam 20‑-35 hadoŭ, ale byvajuć i vyklučeńni. Naprykład, adna biełaruska prapanavała svaje pasłuhi za hanarar 1,8 miljona rasijskich rubloŭ (kala 23 tysiač dalaraŭ). Žančynie 37 hadoŭ, ale jana piša, što maje dośvied u surahatnym maciarynstvie i padkreślivaje: nikoli nie mieła abortaŭ, vykidyšaŭ i apieracyj — mahčyma, tut havorka pra hiniekałahičnyja apieracyi. Taksama, piša žančyna, jana naradziła dvaich dziaciej naturalnym čynam, a nie praz kiesarava siačeńnie.

Inšaja para hatovaja zapłacić za vynošvańnie ich dziciaci bolš za 20 tysiač dalaraŭ. Ź ich 18 tysiač žančyna atrymaje ŭłasna za rody, 2 tysiačy — za padsadžvańnie embryjona, 500 dalaraŭ — adnarazovaja vypłata na novaje adzieńnie, i jašče pa 450 dalaraŭ štomiesiac na žyćcio. Kali žančyna zaciažaryć bliźniatami abo spatrebicca kiesarava siačeńnie, abiacajuć dadać jašče dźvie‑try tysiačy.

Možna znajści abjavy i ad maładzieńkich dziaŭčat, hatovych iści ŭ surmamy. Naprykład, takuju pasłuhu prapanuje 22‑hadovaja viciablanka, jakaja maje svajo dzicia. Biełaruska prosić hanarar pamieram 2 miljony rasijskich rubloŭ (kala 25 tysiač dalaraŭ).

Vyhladaje, što navat ułasnaja ciažarnaść nie pieraškadžaje niekatorym žančynam prapanoŭvać siabie ŭ surahatnyja maci:

«Ja adkaznaja i prystojnaja surmama, jakaja z pavahaj stavicca da vas i vašaha małoha. Ja čakaju svaich bija (bijałahičnych dziaciej. — NN) u bližejšy čas».

Biełaruskimi surahatnymi maci časam cikaviacca rasijanie. Jość abjavy z rasijskimi danymi dla suviazi, dzie padkreślivajecca, što žančynu šukajuć mienavita na terytoryi Biełarusi.

U Biełarusi surahatnaje maciarynstva rehulujecca zakonam «Ab dapamožnych repraduktyŭnych technałohijach». Pavodle jaho, u surahatnyja maci moža iści žančyna 20‑-35 hadoŭ, jakaja maje chacia b adno ŭłasnaje dzicia i nie maje miedyčnych supraćpakazańniaŭ. Taksama jość patrabavańni da pravavoha statusa žančyny: naprykład, jana musić nie być asudžanaj za ciažkija ci asabliva ciažkija złačynstvy suprać čałavieka, nie być padazravanaj ci abvinavačanaj pa kryminalnaj spravie i h.d.

U Biełarusi jość niekalki ahienctvaŭ, jakija padbirajuć surahatnych mam i supravadžajuć ich na ŭsim šlachu maciarynstva, taksama ź biełaruskami pracujuć ahienctvy z Rasii.

Ahienctvy abiacajuć staranna abśledavać kandydatak u surmamy. Bijałahičnyja baćki padpisvajuć damovu z budučaj surahatnaj mamaj. 

Paśla padpisańnia damovy ŭ arhanizm žančyny pieranosiać embryjon ci niekalki embryjonaŭ. Jany mohuć być zroblenyja z pałavych kletak abaich bijałahičnych baćkoŭ, ale mahčyma i skarystacca donarskimi kletkami: hałoŭnaje, kab chacia b adzin z baćkoŭ, jakija padpisali damovu z surahatnaj mamaj, daŭ dla embryjona mienavita svaje kletki.

Kali ŭsio atrymałasia, žančyna vynošvaje dzicia jak zvyčajna. Pavodle zakona surahatnaja maci abaviazanaja, akramia ŭsiaho inšaha, svaječasova prachodzić miedahlady, słuchacca daktaroŭ i, viadoma, paśla rodaŭ pieradać dzicia bijałahičnym baćkam. Cikava, što žančyna taksama maje prava na dziaržaŭnuju dapamohu. A kali surahatnaja maci — svajačka bijałahičnaj maci, mahčyma zładzić uvieś praces i biez hanararu za vynošvańnie dziciaci.

• 3
• 0
• 1
• 3
• 0
• 0
• 0
• 0