Zatrymanych padčas suda nad hraficistami 20 chvilin bili nahami i aštrafavali; siarod ich žurnalist Tut.by
25 studzienia pačaŭsia sud pa «spravie hraficistaŭ». Žurnalist TUT.BY Pavieł Dabravolski pavinien byŭ aśviatlać padzieju. Jon byŭ zatrymany i źbity.
Pierad pačatkam pasiadžeńnia niekalki aktyvistaŭ, prysutnych u budynku suda, razharnuli raściažku z nadpisam «Nie palityčnamu pieraśledu» i kryčali: «Mastactva — nie złačynstva». Ich hvałtam vyvieli z zały suda.
Žurnalist TUT.BY znachodziŭsia za dźviaryma zały pasiadžeńnia. Ubačyŭšy, što z zały siłkom vyvodziać maładych ludziej — Paŭła Siarhieja i Maksima Šycika, jon pačaŭ zdymać toje, što adbyvajecca, na kamieru. Jaho zatrymali razam z aktyvistami.
Jak paviedamlajuć pravaabaroncy pazbaŭlenaha rehistracyi PC «Viasna», adrazu paśla zatrymańnia aktyvistaŭ i žurnalista pačali źbivać u susiednim pakoi — huki źbićcia byli čuvać u zale suda. Paśla hetaha ich advieźli ŭ RUUS, dzie skłali pa dva pratakoły: pa artykułach KaAP 24.1 «Niepavaha da sudu» i 23.4 «Niepadparadkavańnie zakonnym patrabavańniam słužbovaj asoby». Potym zatrymanych pryvieźli znoŭ u sud Frunzienskaha rajona, kab pryciahnuć da administracyjnaj adkaznaści, pry hetym asabistyja rečy pakinuli ŭ RUUS. Na chłopcach byli vidać ślady źbićcia.
Pa słovach samoha Paŭła, u jaho kanfiskavali telefon, usie źviestki ścierli. Niekalki supracoŭnikaŭ AMAP, paviedamiŭ Pavieł, jaho pavalili na padłohu i źbivali nahami na praciahu 20 chvilin. Pry hetym jon adznačyŭ, što pry im byŭ bedž žurnalista i supracoŭniki milicyi hety dakumient bačyli.
Jak paviedamlajuć pravaabaroncy, Maksima Šycika i Paŭła Dabravolskaha prysudzili da štrafu 45 bazavych vieličyń — 9 450 000 biełaruskich rubloŭ, a Paŭła Siarhieja da štrafu ŭ 50 bazavych vieličyń — 10 500 000. Sudździa — Maryja Jarochina. U jakaści śviedki vystupiŭ supracoŭnik orhanaŭ unutranych spraŭ Siarhiej Kavalčuk, jaki, pa słovach asudžanych, braŭ udzieł u ich źbićci.
Pradstaŭnik Frunzienskaha RUUS niedastupny dla kamientaroŭ. Pres-sakratar HUUS Minharvykankama Alaksandr Łastoŭski paabiacaŭ prakamientavać situacyju paźniej.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary