«Biełavija» padviała vyniki akcyi: nabyli 36 950 kvitkoŭ, bolš za ŭsio — na rejsy ŭ Pieciarburh i Tbilisi
Padčas akcyi «Biełavija» pa źnižanych koštach vykupili 36 950 miescaŭ u samalotach. Bolš za ŭsio — na rejsy ŭ Sankt-Pieciarburh — 3430 miescaŭ. Biełaruski avijapieravozčyk padvodzić vyniki dvuchdzionnaj akcyi, jakuju aktyŭna abmiarkoŭvali biełarusy ŭ kancy minułaha tydnia.
U honar dvaccacihodździa avijakampanija vykłała 114 tysiač biletaŭ pa panižanym taryfie 20 jeŭra na bolš čym sorak kirunkaŭ. Navat z usimi zborami cana akcyjnych kvitkoŭ była istotna nižej za zvyčajnyja ceny biełaruskaha pieravozčyka.
Pavodle infarmacyi pres-słužby «Biełavija», pa akcyi vykuplena 36 950 miescaŭ, 55% pakupnikoŭ va ŭzroście ad 25 da 34 hadoŭ, 60,5% — žančyny.
TOP-5 napramkaŭ pa vynikach dvuch dzion: Sankt-Pieciarburh — 3430 miescaŭ, Tbilisi — 2922, Praha — 2598, Maskva — 2532, Amsterdam — 2454.
Akcyja raspaŭsiudžvałasia tolki na kuplu biletaŭ u internecie — niepadrychtavany da vialikaha napłyvu naviedvalnikaŭ sajt avijapieravozčyka «loh», za što «Biełavija» potym pryjšłosia vybačacca, terminova vypraŭlajučy situacyju. U vyniku akcyju praciahnuli na dzień — pasažyry mieli mahčymaść łavić tańniejšyja kvitki 5 i 6 sakavika. Jak adznačajuć u pres-słužbie, sajt pryjšłosia «ŭzmacnić» amal u vosiem razoŭ. Maksimalna ŭ dni źnižak na sajcie byli 11 tysiač čałaviek pry siarednim pakazčyku ŭ 100 naviedvalnikaŭ u zvyčajny čas.
Padčas kupli kvitkoŭ niekatoryja pasažyry sutykalisia ź nieparazumieńniami. Naprykład, byli tyja, u kaho za adzin bilet hrošy śpisvalisia dvojčy. Jak tłumačać u avijakampanii, usie zapyty apracoŭvajucca, hrošy viartajucca ŭ paradku čarhi — jak praviła, na heta sychodzić try bankaŭskija dni.
«Kali pryjšło paćvierdžańnie apłaty, ale pakul niama bileta ci paćvierdžańnia broni, to možna pravieryć broń u raździele «status braniravańnia» na našym sajcie: uviadzicie pieršyja 6 litar z numara zakazu i proźvišča - sajt pieranakiruje vas na staronku ź biletam», — tłumačyć avijapieravozčyk, jak spravicca ź jašče adnoj pamyłkaj.
«Pieravažnaja kolkaść novych pasažyraŭ — ludzi jakija spantanna nabyli kvitki. Jany ci nie źbiralisia lacieć naohuł, ale zaŭvažyŭšy akcyju, navažylisia na padarožža, abo źbiralisia tearetyčna biez dakładnych terminaŭ, ale akcyja ich padšturchnuła na pajezdku. Mnohija z dapamohaj akcyi vyrašylisia na niekalki pajezdak na praciahu hetaha hoda. Heta vydatny dla «Biełavija» vopyt, tak jak bolšaść — heta dadatkovyja pasažyry da tych, jakija b i tak palacieli. Što heta značyć? Heta značyć, što padobnyja akcyi avijakampanija budzie praciahvać pravodzić», - adznačaŭ u siabie na staroncy na Facebook namieśnik hiendyrektara «Biełavija» Ihar Čarhiniec.
Da budučych akcyj avijakampanija abiacaje padrychtavacca lepš.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary