Kabiakoŭ: Pavyšeńnie piensijnaha ŭzrostu nie stvoryć deficytu rabočych miescaŭ
Pavieličeńnie piensijnaha ŭzrostu nie pryniasie za saboj deficytu rabočych miescaŭ. Takoje mierkavańnie žurnalistam vykazaŭ premjer-ministr Biełarusi, kamientujučy ŭkaz numar 137 «Ab udaskanaleńni piensijnaha zabieśpiačeńnia».
«Pastupovaje pavyšeńnie piensijnaha ŭzrostu stvoryć pieradumovy da taho, što kolkaść zaniatych na rynku pracy budzie pavialičana. Tolki ŭ 2017 hodzie nam spatrebicca kala 18 tysiač dadatkovych rabočych miescaŭ. Zadača kiraŭnika dziaržavy — štohod pryrastać na 50 tysiač novych rabočych miescaŭ. Tamu pavieličeńnie piensijnaha ŭzrostu nie pahražaje deficytam rabočych miescaŭ», — padkreśliŭ Andrej Kabiakoŭ.
Pavieličeńnie kolkaści zaniatych na rynku pracy budzie sadziejničać pavieličeńniu vałavoha ŭnutranaha praduktu. Akramia taho, pavyšeńnie piensijnaha ŭzrostu daść mahčymaść harantavana padtrymlivać suadnosiny siaredniaj piensii pa ŭzroście i siaredniaj zarabotnaj płaty na ŭzroŭni 40%. «Apošnim časam heta z ulikam niaźmiennaha piensijnaha ŭzrostu z hodu ŭ hod udavałasia ŭsio ciažej», — kanstatavaŭ premjer-ministr.
Kamientary