U centry Minska daišnik zatrymlivaŭ matacyklista, kali ŭ ich urezalisia inkasatary
Inśpiektar u vielmi ciažkim stanie špitalizavany, matacyklista taksama paviezła chutkaja.
Zdareńnie adbyłosia na rahu vulicy Mašerava i praśpiekta Niezaležnaści. Pakul nieviadoma, jak mienavita razhortvalisia padziei. Mierkavańni vidavočcaŭ i papiaredniaja viersija śledstva adroźnivajucca.
Dakładna viadoma, što matacykłam kiravaŭ 31-hadovy žychar Žłobina. Raniej jon nieadnarazova pryciahvaŭsia da adkaznaści za parušeńni PDR (milicyja paviedamlaje pra 52 parušeńni, ale nie ŭkazvaje, za jaki pieryjad), a taksama nieadnarazova pazbaŭlaŭsia paśviedčańnia kiroŭcy za pieravyšeńnie chutkaści.
Matacyklist ruchaŭsia pa praśpiekcie Mašerava ŭ bok praśpiekta Niezaležnaści. Pierad skryžavańniem jon vyjechaŭ na tramvajnyja šlachi i tam čakaŭ zialonaha śviatła.
Ekipaž DPS, jaki stajaŭ pierad śvietłaforam, zaŭvažyŭ, što na matacykle niama rehistracyjnych znakaŭ, tamu inśpiektar padyšoŭ da matacyklista i zapatrabavaŭ pradjavić dakumienty.
Što adbyłosia dalej, dakładna nieviadoma. Vidavočcy kazali, što matacyklist rezka startanuŭ ź miesca, a inśpiektar schapiŭsia za styrno. Milicyja śćviardžaje, što matacyklist začapiŭ inśpiektara i paciahnuŭ za saboj.
Tym časam zaharełasia zialonaje śviatło dla aŭtamabilaŭ, jakija jechali pa praśpiekcie Niezaležnaści. Aŭtamabil ź inkasatarami nie bačyŭ matacyklista ź inśpiektaram. Adbyłosia sutyknieńnie.
Pa słovach vidavočcaŭ, druhi inśpiektar z ekipaža apieratyŭna pierakryŭ ruch na praśpiekcie i spyniŭ chutkuju. Miedyki i vidavočcy akazvali paciarpiełamu inśpiektaru dapamohu na miescy, ale ŭ prytomnaść jon tak i nie pryjšoŭ.
DAIšnika špitalizavali ź ciažkaj čerapna-mazhavoj traŭmaj i pierałomam nahi. Matacyklista taksama pavieźli ŭ balnicu. Pra jaho stan pakul nie paviedamlajecca.
* * *
Čytajcie taksama:
Kamientary