Kanhres ZŠA prapanuje adnavić vytvorčaść najlepšych u śviecie źniščalnikaŭ F-22
Kamitet pa ŭzbrojenych siłach Pałaty pradstaŭnikoŭ ZŠA daručyŭ VPS vyvučyć mahčymaść adnaŭleńnia vytvorčaści źniščalnika 5-ha pakaleńnia F-22 Raptor u 2017 hodzie.
Takija prapanovy hučali nieadnarazova paśla taho, jak Rasija ździejśniła ahresiju suprać Ukrainy i znoŭ pačała razhladacca ŭ Vašynhtonie jak adna z hałoŭnych pahroz.
«U śviatle rostu pahroz dla pavietranaha panavańnia ZŠA ŭ vyniku chutkaha technałahičnaha raźvićcia praciŭnikaŭ i rostu popytu z boku chaŭruśnikaŭ i partnioraŭ na vysakazdolnyja šmatmetavyja samaloty, kab adkazvać na novyja i bolš ciažkija pahrozy dla suśvietnaj biaśpieki», — hetak Kamitet apisvaje pryčyny, pa jakim ličyć zvarot da F-22 Raptor vartym razhladu.
Ciapier ZŠA majuć 186 samalotaŭ F-22, ź jakich tolki 123 niepasredna ŭ bajavoj hatoŭnaści, piša nationalinterest.org.
Hetyja źniščalniki ličacca najbolš bajazdolnymi ŭ śviecie, dziakujučy technałohijam «stełs», mahutnamu rakietnamu ŭzbrajeńniu i intehravanaj sistemie elektronnaha kiravańnia. Adnak jany akazalisia vielmi darahimi i praźmierna skiravanymi na pavietranyja bai.
U kancy 2000-ch hadoŭ u ZŠA z-za ekanamičnaha kryzisu i mierkavanych budučych pahroz tolki z boku terarystaŭ, a nie prasunutych avijakaśmičnych dziaržaŭ, takich jak RF i Kitaj, było vyrašana admovicca ad vytvorčaści F-22. F-35 Lightning II, jaki vyrablajecca ŭ troch madyfikacyjach, ličycca bolš univiersalnaj i tannaj mašynaj.
Ekśpierty sumniajucca, što vytvorčaść F-22, samaj mahutnaj mašyny ŭ sučasnym niebie, budzie adnoŭlenaja - mašyna, raspracoŭka jakoj pačałasia ŭ 1980-ja hady, užo ŭ značnaj stupieni nie adpaviadaje novym standartam vytvorčaści, jak i jaje kampjutarnaje «načyńnie».
Daloka napierad pajšli taksama raspracoŭki ŭ śfiery małazaŭvažnaści i avijonicy, avijacyjnych ruchavikoŭ.
Bolš za toje, VPS ZŠA ŭžo pačali pracavać nad novym prajektam źniščalnika, jaki ŭmoŭna nazvany F-X.
Kamientary