Jon jašče nie hatovy, ale ŭžo pretenduje na zvańnie miascovaj słavutaści. Sprava ŭ tym, što ŭ budynku niama vuhłoŭ.
Haspadary śćviardžajuć, što takoje žyllo bolš tryvałaje, lepš zachoŭvaje ciapło i prosta ŭpryhožvaje architekturnaje abličča rajcentra.
Dom-kupał na ŭskrainie rajcentra Horki staŭ miascovaj słavutaściu jašče na etapie budaŭnictva. Adny zachaplajucca niezvyčajnym dyzajnam, inšyja, naadvarot, krytykujuć: moža, i pryhoža, ale niepraktyčna.
Alaksandr i Natalla Bazylevy prajekt budučaha doma vybirali doŭha i staranna: vyvučyli amal ŭsie budaŭničyja i architekturnyja forumy ŭ internecie. Dom u vyhladzie kupała adrazu pryciahnuŭ ich uvahu.
«Jon vielmi pryhožy i niezvyčajny. Łaźnia, chutčej za ŭsio, budzie kruhłaja. Nakont ciaplicy jašče nie viedaju. Chutčej za ŭsio, i jana taksama», — kaža Natalla.
Dzieci taksama acanili pieravahi kruhłaha doma, ciapier za svavolstvy ich u kut dakładna nie pastaviać. U kiraŭnika siamiejstva bolš važkija arhumienty — takoje žyllo moža vytrymać lubyja pryrodnyja kataklizmy. Jaho značna tańniej i budavać, i ekspłuatavać.
«Płanuju zrabić ciopłuju padłohu i na druhim paviersie paviesić dva-try radyjatary. Hetaha budzie całkam dastatkova dla abahrevu. U pramavuholnym pamiaškańni ciopłaje pavietra padnimajecca ŭvierch — i nijakaha ruchu. A tut pavietra budzie spuskacca pa ścienach kupału — atrymlivajecca naturalny efiekt vientylacyi i abahrevu», — tłumačyć Alaksandr.
Darečy, heta nie pieršy kruhły dom u Biełarusi. Kab pieraniać dośvied, Natalla i Alaksandr z Horak jeździli da kupałabudaŭnika na Viciebščynu.
U instytucie «Mahiloŭhramadzianprajekt» z kruhłymi damami pakul nie sutykalisia. Zrešty, miascovyja architektary nie bajacca niezvyčajnych formaŭ. Niekalki hadoŭ tamu raspracavali prajekt doma-knihi — prapanoŭvali pabudavać jaho da Dnia piśmienstva ŭ Bychavie. Ale čynoŭniki ideju nie padtrymali. A voś novy korpus mahiloŭskaha ŭniviersiteta ź niezvyčajnym uvachodam u formie kuzava hruzavika ŭžo nabyvaje realnyja abrysy. Darečy, u narodzie hetuju VNU nazyvajuć «mašynka».
Skieptyčna hladzić na niezvyčajny budynak budučy susied siamji Bazylevych Jaŭhien. Jon prychilnik kłasičnaha stylu i ŭpeŭnieny, što sapraŭdny dom pavinien być krepaściu.
Adnak haspadary kruhłaha budynka hladziać na śviet ź inšaha rakursu: u takim domie možna zrabić šklanuju stol i lubavacca zornym niebam.
Kamientary