Pavodle vynikaŭ pieršaha paŭhodździa prodaž biełaruskich «MAZaŭ» na rasijskim rynku skaraciŭsia na 23,4%, śviedčać źviestki rasijskaha analityčnaha ahienctva «Aŭtastat», jakoje śpiecyjalizujecca na rynku transpartnych srodkaŭ.
Za studzień—červień 2016 hoda, pavodle danych ahienctva, na rasijskim rynku było realizavana 1.366 hruzavych aŭtamabilaŭ «MAZ» (poŭnaj masaj bolšaj za 3,5 tony), što na 23,4% mienš u paraŭnańni ź pieršaj pałovaj minułaha hoda.
Za hety ž pieryjad KAMAZu, jaki źjaŭlajecca adnym z asnoŭnych kankurentaŭ biełaruskaha vytvorcy, udałosia pavialičyć prodaž na 11,5% u paraŭnańni z anałahičnym pieryjadam minułaha hoda.
Pry hetym u červieni 2016 hoda na rasijskim rynku było pradadziena 1.559 hruzavych aŭtamabilaŭ «KAMAZ», što na 15,5% bolš u paraŭnańni z anałahičnym miesiacam minułaha hoda. U toj ža čas biełaruskamu vytvorcu na rasijskim rynku ŭdałosia pradać 269 «MAZaŭ», na 1,1% bolš u paraŭnańni z anałahičnym miesiacam minułaha hoda.
U červieni 2016 hoda sukupny abjom rasijskaha rynku novych hruzavych aŭtamabilaŭ, na jakim biełaruski vytvorca realizuje asnoŭny abjom svajoj techniki, skłaŭ 4,1 tys. adzinak. Pry hetym u červieni prodaž hruzavych aŭtamabilaŭ na rasijskim rynku ros treci miesiac zapar, paviedamlaje «Aŭtastat».
Pavodle vynikaŭ pracy za pieršuju pałovu 2016 hoda dola MAZa na rasijskim rynku hruzavych aŭtamabilaŭ skłała 6,2% suprać 7,4% za anałahičny pieryjad 2015 hoda.
Dola KAMAZa ŭ ahulnym abjomie prodažu na rasijskim rynku novych hruzavych aŭtamabilaŭ skłała ŭ studzieni—červieni 2016 hoda 40,9% i pavialičyłasia ŭ paraŭnańni z anałahičnym pieryjadam minułaha hoda na 8,1 pracentnaha punkta.
Nahadajem, u krasaviku hetaha hoda Minski aŭtamabilny zavod naviedvaŭ Alaksandr Łukašenka i zajaviŭ, što pradpryjemstva moža atrymać dziaržpadtrymku tolki pad kankretnyja rynki zbytu. «Vy atrymajecie hrošy, mahčyma, i kitajskija kredyty, tolki tady, kali pakažacie, što ŭ vas jość rynki, kudy pradaście hetuju pradukcyju. U inšym vypadku nie dadzim ni kapiejki», — papiaredziŭ Łukašenka.
Kamientary