Samyja maładyja kandydaty ŭ deputaty — kamunisty i prychilnicy Hajdukieviča FOTY
Na ŭsiu Biełaruś patencyjnych kandydataŭ u deputaty naličyłasia 630 čałaviek (ich asoby jašče nie zaćvierdžanyja vybarčymi kamisijami). Heta ludzi roznaha sacyjalnaha statusa, roznych prafiesij i pohladaŭ.
Dadatkovy intares vyklikajuć samyja maładyja ŭdzielniki vybaraŭ. Sioleta bałatujucca dzieviać čałaviek, jakija naradzilisia ŭ 1993-1994 hadach. «Naša Niva» sabrała infarmacyju pra hetych ludziej.
Maładyja kamunisty
Najbolšaje pradstaŭnictva ŭ našym śpisie majuć kamunisty, pryčym jość jak prałukašenkaŭskija, tak i kalakinskija.
Student Viciebskaha dziaržaŭnaha ŭniviersiteta Anton Kruhlašoŭ letaś byŭ abrany sakratarom pa ideałahičnaj pracy. Jahonaja misija — pryciahvać moładź praz małalikuju hrupu «Ukantakcie». Praŭda, ź Viciebska ŭ joj usiaho 14 čałaviek. Akaŭnta samoha Kruhlašova «Ukantakcie» znajści nie ŭdałosia.
Tamsama vučycca jašče adzin małady kamunist — Uładzisłaŭ Citoŭ. U svabodny čas chłopiec padpracoŭvaje kłoŭnam.
Na jaho staroncy «Ukantakcie» možna znajści śviatočnaje sełfi z płanšetam, atrymanym na usiebiełaruskim churale.
Histfak pieduniviersiteta sioleta skončyŭ Dźmitryj Reut. Pakul što jon ličycca biespracoŭnym. Viadoma ž, na staroncy kamunista nie abyšłosia biez vyjavy Stalina.
Ich kaleha sa «Spraviadlivaha śvietu» — Artur Smalakoŭ.
Na staroncy elektramanciora sihnalizacyi staličnaha mietro spałučajucca vyjavy Stalina, Dudajeva i Basajeva. A na avatarcy staić Juryj Šaŭčuk. «Jość dźvie katehoryi złačyncaŭ. Adny bajacca miantoŭ, inšyja — kamunistaŭ», — taki słohan pierapościŭ Smalakoŭ.
Śpis Hajdukieviča
Z pohladami kamunistaŭ usio zrazumieła, a voś što ŭ hałavie ŭ prychilnikaŭ ŁDPB?
Pra muzyčnaha pramoŭtara Milenu Kieler «Naša Niva» ŭžo pisała.
Ale jana nie adna siarod maładych partyjcaŭ.
Ksienija Japiška letaś skončyła Brescki dziaržaŭny techničny ŭniviersitet. Ciapier pracuje ŭ pryvatnaj kampanii «TEU», jakaja pradastaŭlaje ciepła-enierhietyčnyja pasłuhi. Palityčnaj pazicyi na svaich staronkach u sacyjalnych sietkach dziaŭčyna nie prajaŭlaje. Nie ličyć ža vykazanymi pohladami fota na fonie amierykanskaha ściaha?
Minčuk Alaksandr Škut paznačyŭ «Ukantakcie», što letaś skončyŭ Akademiju MUS. Aficyjna jon ličycca namieśnikam dyrektara pa ahulnych pytańniach navukova-vytvorčaha kaapieratyva «Viektar». A jašče maje internet-kramu «Miedyjamarkiet Plus». Pakazalna, što na adnym z sajtaŭ vodhukaŭ jaho kantora maje haniebny rejtynh 0,16 (!) i ź dziasiatak aburanych klijentaŭ.
Sami za siabie
Narešcie, tolki dvoje čałaviek rehistrujucca jak samavyłučency.
Jahor Levačoŭ vučycca ŭ mahistratury hieahrafičnaha fakulteta BDU. U svoj čas jon pieramahaŭ na respublikanskaj alimpijadzie pa hieahrafii i atrymlivaŭ stypiendyju z fondu padtrymki adoranych dziaciej i moładzi.
Chłopiec u šerahach «Havary praŭdu», ale ad hetaj arhanizacyi vyłučacca niemahčyma, tamu źbiraŭ podpisy ŭ svaju padtrymku ŭ rodnych Biešankovičach.
Pra jašče adnaho kandydata, studenta BDEU Arcioma Malinoŭskaha viadoma mienš. Jon zarehistravany ŭ ahraharadku Padleśsie Słuckaha rajona.
Kamientary