Biełarus Hienadź Karatkievič treci raz vyjhraŭ konkurs prahramavańnia Google

Prahramist Hienadź Karatkievič zaniaŭ pieršaje miesca na konkursie spartyŭnaha prahramavańnia Google Code Jam 2016, finał jakoha prajšoŭ 5 žniŭnia ŭ Ńju-Jorku.

Pavialičyć

U finale Hienadź nabraŭ 170 bałaŭ z 200 mahčymych. Adryŭ ad jaho bližejšaha pieraślednika — filipinca Kievina Soha skłaŭ 50 bałaŭ. Trecim staŭ rasijanin Jahor Kulikoŭ, jaki tydzień tamu abyšoŭ Karatkieviča na turniry Jandieks.Ałhoritm.

«Niečakana, ale moj adryŭ ad druhoha miesca akazaŭsia vielmi značnym — 50 bałaŭ z 200, — raspavioŭ Hienadź navinavamu partału Univiersiteta ICMA. — Tak, naprykład, možna było b zusim nie rašać samuju składanuju zadaču E i pry hetym zastacca na pieršym miescy. U hetaj zadačy prapanoŭvałasia znajści maršrut z kropki startu ŭ kropku finišu na płoskaści, na jakoj jość adna abo dźvie kropki, što vypramieńvajuć radyjacyju. Zrazumieła, u chodzie maršrutu treba było atrymać jak maha mienš vypramieńvańnia».

Pieramožca Google Code Jam aŭtamatyčna traplaje ŭ finał nastupnaha turniru, a taksama atrymlivaje mahčymaść pracaŭładkavańnia ŭ kampaniju i 15 tysiač dalaraŭ pryzavych. Sioleta za pieršaje miesca zmahalisia 27 170 prahramistaŭ z usiaho śvietu.

Hienadź raniej užo pieramahaŭ u hetym konkursie ŭ 2015 i 2014 hadach. Karatkievič staŭ pieršym prahramistam u historyi konkursu, jakomu ŭdałosia trojčy padniacca na pieršaje miesca.

Ciapier Biełaruś zajmaje pieršaje miesca ŭ ahulnym «miedalnym» zaliku krain-udzielnic Google Code Jam. U biełarusaŭ užo čatyry pieršyja miescy — try pieramohi Karatkieviča i pieršaje miesca vypusknika BDU Ivana Miacielskaha ŭ 2013 hodzie.

Hienadź Karatkievič skončyŭ škołu ŭ Homieli, a ŭ 2012 hodzie staŭ studentam Univiersiteta infarmacyjnych technałohij, miechaniki i optyki ŭ Sankt-Pieciarburhu. Raniej jon užo byŭ viadomy jak pieramožca mnostva spabornictvaŭ pa spartyŭnym prahramavańni: jon moža pachvalicca pieršymi miescami na VK Cup, Russian Code Cup, TopCoder Open, Jandieks.Ałhoritm, Facebook Hacker Cup i mnohich inšych konkursach.

Tydzień tamu Hienadź raspavioŭ, što pakul nie vyznačyŭsia z budučym miescam pracy: «Paśla zakančeńnia univiersiteta, mahčyma, budu pracavać u bujnoj kampanii, kab zrazumieć, nakolki heta mnie padychodzić. Kali pa niejkich pryčynach vyrašu, što heta nie majo, adkryju svaju spravu, ale što heta budzie, pakul skazać nie mahu. Da hetaha pakul daloka. Pa krainach asablivych pieravah niama — hatovy, kali prapanujuć cikavuju pracu, zastacca ŭ Biełarusi».

• 0
• 0
• 0
• 0
• 0
• 0
• 0
• 0