«Viečiernij Minsk» admoviŭsia drukavać prahramu kandydata Juryja Chaščavackaha

Redakcyja haziety «Viečiernij Minsk» admoviłasia drukavać prahramu kandydata ŭ deputaty Pałaty pradstaŭnikoŭ ad Abjadnanaj hramadzianskaj partyi Juryja Chaščavackaha. U admovie, jakuju cytuje sajt ucpb.org, havorycca:

«Pavažany Juryj Iosifavič! Paviedamlajem, što Vaša pieradvybarnaja prahrama, padadzienaja 19.08.2016 u redakcyju haziety «Viečiernij Minsk» UP «Ahienctva «Minsk-Naviny», nie moža być apublikavanaja, bo nie adpaviadaje patrabavańniam artykułaŭ 47 i 75 Vybarčaha kodeksa Respubliki Biełaruś ad 11 lutaha 2000 h. № 37-3. Z pavahaj, hałoŭny redaktar haziety «Viečiernij Minsk» S.A.Protas».

U artykułach 47 i 75 havorycca, što prahrama kandydata nie pavinna źmiaščać prapahandy vajny, zaklikaŭ da hvałtoŭnaj źmieny kanstytucyjnaha ładu, parušeńnia terytaryjalnaj cełasnaści Respubliki Biełaruś, da sacyjalnaj, nacyjanalnaj, relihijnaj i rasavaj varožaści, zaklikaŭ, jakija padachvočvajuć abo majuć svajoj metaj padachvočvańnie da zryvu, abo admieny, abo pieranosu terminu vybaraŭ, pryznačanych u adpaviednaści z zakanadaŭčymi aktami Respubliki Biełaruś, a taksama abrazaŭ i paklopu ŭ dačynieńni da słužbovych asobaŭ Respubliki Biełaruś, inšych kandydataŭ u deputaty.

Na dumku samoha Chaščavackaha, u jaho prahramie niama nijakaha parušeńnia nazvanych normaŭ. Viadomy režysior miarkuje, što redakcyi moh nie spadabacca, naprykład, nastupny pasaž u jaho prahramie: «20 hadoŭ my žyviem u režymie adzinaŭładździa, i rašeńni prymaje adzin nie vielmi adukavany čałaviek, hałoŭnaj metaj jakoha źjaŭlajecca nie raźvićcio Biełarusi, a ŭtrymańnie asabistaj, ničym nie abmiežavanaj ułady».

«Kali jany pakryŭdzilisia za Alaksandra Ryhoraviča, tamu što ja skazaŭ, što jon nie vielmi adukavany čałaviek. Ale heta taksama praŭda. Usim viadoma, što historyk pa adukacyi, pieršy prezident Respubliki Biełaruś, u stalicy jakoj praśpiekt byŭ nazvany imiem vydatnaha aśvietnika Francyska Skaryny, skazaŭ, što Skaryna žyŭ i pracavaŭ u Piciery. Heta jaho słovy. Choć Skaryna pamior za 150 hadoŭ da taho, jak byŭ zakładzieny Sankt-Pieciarburh. Historyk, a tym bolš prezident pavinien byŭ by heta viedać. Kali jon hetaha nie viedaje, značyć, prapuściŭ paru lekcyj, nie vučyŭsia ŭ siemiestry, h.zn. jon nie vielmi adukavany čałaviek. Taksama ŭsim viadomyja jaho litaraturnyja viedy, da prykładu, z nahody vieršaŭ Bykava», — prakamientavaŭ Chaščavacki.

Chaščavacki nie pieršy kandydat, jaki sutykajecca z admovaj publikavać prahramu. Z takimi ž prablemami sutyknulisia, naprykład, Mikałaj Ułasievič u Astraŭcy dy Ihar Masłoŭski ŭ Breście. A televystup Paŭła Stefanoviča nie pakazali pa telebačańni sa zhody Centrvybarkama.

• 0
• 0
• 0
• 0
• 0
• 0
• 0
• 0