Psichołaha-psichijatryčnaja ekśpiertyza byłoha studenta MIPSA, jaki napaŭ ź bienzapiłoj i siakieraj na ludziej u minskim handlovym centry «Novaja Jeŭropa», pradoŭžana.
Pra heta BiełaPAN paviedamiła aficyjny pradstaŭnik Śledčaha kamiteta Biełarusi Julija Hančarova.
Sprava rasśledujecca hałoŭnym śledčym upraŭleńniem SK.
Pavodle słoŭ Hančarovaj, ŭstanaŭlivajucca ŭsie abstaviny zdareńnia. Śledčyja atrymali pakazańni bolš za 100 śviedak. Dałučanyja da materyjałaŭ spravy i praanalizavanyja vyniki zvyš 30 ekśpiertnych daśledavańniaŭ.
«U metach pahłyblenaha vyvučeńnia asoby padazravanaha i matyvaŭ učynienaha złačynstva praviadzieńnie stacyjanarnaj kompleksnaj psichołaha-psichijatryčnaj ekśpiertyzy pradoŭžanaje. Miera strymańnia zastajecca raniejšaj — źniavoleńnie pad vartu», — skazała Hančarova.
Nahadajem, złačynstva było ŭčyniena ŭviečary 8 kastryčnika. Chłopiec ź bienzapiłoj i siakieraj napaŭ na rabotnikaŭ i naviedvalnikaŭ HC na vulicy Surhanava ŭ stalicy. U vyniku adna žančyna zahinuła, dźvie — atrymali traŭmy. Maładoha čałavieka zatrymali pradprymalniki da pryjezdu milicyi. Raspačata sprava ab zabojstvie pry abciažvajučych abstavinach pa č. 2 art. 139 KK. Rasśledavańnie ŭziaŭ na kantrol staršynia Śledčaha kamiteta Ivan Naskievič. Padazravanamu pryznačanaja stacyjanarnaja kompleksnaja psichołaha-psichijatryčnaja ekśpiertyza.
Chłopiec chacieŭ być zabitym pry zatrymańni. Jaho metaj było zabojstva jak maha bolšaj kolkaści ludziej. Dva hady tamu małady čałaviek prachodziŭ lačeńnie ŭ psichijatryčnym dyspansiery. Raniej sudzimy nie byŭ, vychoŭvaŭsia ŭ zabiaśpiečanaj siamji. Ale ciapier baćki nie pražyvajuć razam i, pa sutnaści, vychavańniem dziciaci nie zajmalisia. Baćka žyvie asobna ad syna ŭ Minsku, maci i siastra — za miažoj.
Rašeńnie ab učynieńni masavaha zabojstva z asablivaj žorstkaściu małady čałaviek pryniaŭ daŭno. U kastryčniku jon płanavaŭ ździejśnić anałahičnaje złačynstva pa miescy vučoby, adnak nie davioŭ namier da kanca pa pryčynach, jakija ad jaho nie zaležali. Nibyta nie zmoh zavieści piłu.
Svaju vinu ŭ złačynstvie ŭ «Novaj Jeŭropie» 17-hadovy chłopiec pryznaŭ. Matyvam, pavodle jaho słoŭ, stała rasčaravańnie ŭ samim sabie, ahida da čałaviectva, depresiŭny nastroj.
Padazrony — były student pieršaha kursa MIPSA Uładzisłaŭ Kazakievič. U intervju prahramie «Hałoŭny efir» telekanała «Biełaruś 1» 16 kastryčnika baćka zatrymanaha skazaŭ, što ŭ syna byli kompleksy z-za źniešnaści i vuhroŭ. Minułym letam Uładzisłavu byli pryznačany novyja leki, jakija i mahli paŭpłyvać na psichičny stan chłopca.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary