Baćka «anarchista Ramanava» raskazaŭ akaličnaści ćmianaj spravy

Paśla pieršych emocyj ad prahladu prapahandysckaha filma «Zvanok siabru», u jakim BT vyciahnuła ŭ śviet historyju raniej nieviadomaha «anarchista Ramanava», baćka hetaha chłopca daŭ «Našaj Nivie» razhornuty kamientar.

Pavialičyć

Pavialičyć

Trochi raniej, nahadajem, jon abiacaŭ «skrucić bašku» aŭtaram filma. 

«Pieršaje. Zatrymańnie było, heta fakt.

Druhoje. A što jon źjaŭlajecca anarchistam i, tym bolš, aktyŭnym, jak jany kažuć… Mnie nieviadoma, adkul jany heta ŭziali. Kamientaroŭ tut u mianie niama.

Treciaje — teza, što jon rychtavaŭ vybuch — heta biazdokaznyja domysły. Dakumientalnych dokazaŭ hetamu niama. Navat havorki nie było pra heta ŭ čas raźbiralnictvaŭ! I vašyja kalehi z hetaha telekanała pastupili nieprafiesijna, miakka kažučy, prosta nieprystojna zrabili. Davać u efir ź nieba ŭziatyja fakty — heta brydka», — skazaŭ Alaksandr Siarhiejevič. 

«Kirujučysia ich łohikaj i biaručy da ŭvahi apošnija padziei, možna schapić luboha čałavieka ź bienzapiłoj i padvieści vysnovu, što «možna tolki hadać, čym by ŭsio skončyłasia, kali b my jaho nie zatrymali». I takich idyjockich prykładaŭ možna šmat pryvodzić, ale ja nie ab hetym ciapier. Ni ja, ni maja siamja ciapier hetaje pytańnie abmiarkoŭvać nie chočam. Heta było daŭno, i navošta ciapier viartacca i addavać svajho syna na razarvańnie ŭ ŚMI, albo rabić jaho raźmiennaj manietaj u razborkach roznych hrupovak? My nie chočam takoha», — dadaŭ baćka. 

Što datyčyć traciłu, ź jakim zatrymali chłopca, to baćka paćvierdziŭ, što vybuchovaje rečyva było pry im. 

«Tracił byŭ, sapraŭdy. Ja, paŭtarusia, nie chacieŭ by šmat kazać pra heta. Skažu tak, što syn navat nie viedaŭ, što heta. Jon chacieŭ zdać heta ŭ milicyju, ale atrymałasia, jak atrymałasia. Razumiejecie, maje ž słovy taksama — nie iścina apošniaj instancyi. Usio musić być dakumientalna padmacavana. Heta ja kažu da taho, što tyja ludzi, jakija hetuju spravu vyciahnuli — žurnalisty, jany pavinny byli bačyć, što tam napisana. A tam usio kankretna — jak, što, kali i čamu. I jany taksama pavinny byli bačyć, što farmuloŭki «teraryzm» niama. Tak, moj syn ciapier adbyvaje pakarańnie, jakoje praduhledžana zakonam (piać hadoŭ źniavoleńnia). Ale nie za teraryzm ci sprobu ŭčynieńnia terarystyčnaha aktu, heta ŭsio łuchta», — padsumavaŭ baćka i dadaŭ, što dumaje nad padačaj pazova ab abaronie hodnaści, bo ŭsio heta jamu «vielmi nie padabajecca». 

• 0
• 0
• 0
• 0
• 0
• 0
• 0
• 0