Źmicier Pankaviec: Ukantakcie — mahutny instrumient suprać rusifikacyi moładzi

Navina pra zabaronu va Ukrainie sacyjalnych sietak Ukantakcie dy Adnakłaśniki vyklikała žyvuju dyskusiju. Adny rašuča padtrymlivali ŭkraincaŭ. Maŭlaŭ, treba całkam pazbaŭlacca rasijskaj infarmacyjnaj prastory. A Ukantakcie pakidaje ludziej žyć pa kulturnych kodach Maskvy. Plus faktar taho, što piersanalnyja dadzienyja karystalnikaŭ hetaj sacsietki dastupnyja dla rasijskich śpiecsłužbaŭ.

Pavialičyć

Davajcie budziem ščyrymi, na siońnia ŭsie sacyjalnyja sietki ŭ toj ci inšaj formie źbirajuć infarmacyju pra svaich karystalnikaŭ. Chaj heta budzie fejsbuk ci kitajski Qzone. Całkam biaśpiečnaha ničoha nie isnuje. Nie chočaš, kab pra ciabie niešta daviedalisia — nie rehistrujsia nidzie.

Ukantakcie na siońnia — heta samaja papularnaja sacyjalnaja sietka ŭ Biełarusi. Dla bolšaści — heta prosta kanał kamunikavańnia ź siabrami i rodnymi, mahčymaść znajomstva i atrymańnia infarmacyi. Kali razmaŭlaŭ ź niekatorymi ŭkrainskimi siabrami pra zabaronu sacsietak, to jany aburanyja najpierš tym, što ich pazbaŭlajuć zvykłych šlachoŭ kamunikavańnia. Hetyja ludzi addanyja Ukrainie i nie źjaŭlajucca patencyjnymi sieparatystami.

Ukantakcie nie jość tolki srodkam prapahandy. Heta najpierš najmahutniejšy instrumient kontrprapahandy. Čarnasocienskija supołki kštałtu «My patryjoty Biełaj Rusi, ci «Zmahar — vykarystanaja prakładka» nabirajuć pa niekalki tysiač padpisantaŭ. U toj samy čas iraničnaja hrupa «Čaj z malinavym vareńniem» ci patryjatyčnaja «Maja kraina Biełaruś» majuć bolš za 100 tysiač fałovieraŭ kožnaja.

Nie treba zabyvacca, što Ukantakcie — heta ceły płast infarmacyi pa Biełarusi, našaj historyi, movie, našaj słavie. Tut možna znajści supołki na luby hust, a samaje hałoŭnaje, što pa-biełarusku.

Nie sa škoły siońnia pačynajecca patryjatyzm. A ź pieršaha šeru karcinki z Pahoniaj, z prasłuchanaj i źmieščanaj na ścianie pieśni Volskaha ci Michałka, padpiski na biełaruskamoŭnuju supołku.

Na siońnia Ukantakcie — heta adzin z samych mahutnych instrumientaŭ suprać tatalnaj rusifikacyi našaj moładzi. Heta treba pryznać, i z hetym pracavać. U mianie jość ŭražańnie, što pra zabarony Ukantakcie najbolš hučna kryčać tyja ludzi, jakija nie razumiejuć miechanizmaŭ dziejańnia hetaj sacsietki, nie razumiejuć, jak jana moža prynosić karyść, a nie tolki škodu.

Padpisacca na supołku «NN» Ukantakcie možna tut, a Adnakłaśniki - tut.

• 0
• 0
• 0
• 0
• 0
• 0
• 0
• 0