U Minskim haradskim sudzie 19 sakavika vynieśli prysud pa hučnaj spravie «dvarovych čataŭ». Ahułam pavodle hetaj spravy asudzili vosiem žančyn. Ich abvinavacili pavodle art. 357 Kryminalnaha kodeksa — «zmova abo inšyja dziejańni, ździejśnienyja z metaj zachopu dziaržaŭnaj ułady». Usiaho ž pa hetaj spravie było asudžana nie mienš za paŭsotni čałaviek, piša «Viasna».
29 kastryčnika 2024 hoda KDB pryznaŭ «ekstremisckim farmavańniem» inicyjatyvu «Orden», u jakuju ŭvachodziać dvarovyja čaty «Złyje kohtiki», «Sucharievo», «Sienica2.0», «Solidarnosť», «Volnyja vaŭki», «Navahrudskija partyzany», «VILIJA», «Skromnyje matrieški», «Sosiedi».
Pavodle infarmacyi pravaabaroncaŭ, ahułam pa «spravie dvarovych čataŭ» u Biełarusi asudzili sama mieniej 50 čałaviek, 39 ź jakich — žančyny. «Viaśnie» viadoma, što 46 palitźniavolenym pa spravie pryznačyli pazbaŭleńnie voli ad dvuch da 10 hadoŭ kałonii. 26 čałaviek pamiłavali. Za kratami zastajecca jak minimum 21 palitźniavoleny.
Adna z žančyn, źviazanaja z hetaj spravaj, raskazała «Viaśnie» niekatoryja padrabiaznaści. Vieranika była znajomaja ź Irynaj Jakaŭlevaj i Anžełaj Aharok, asudžanymi 19 sakavika da vaśmi z pałovaj hadoŭ kałonii:
«My byli ź imi ŭ adnym žanočym čacie. Z 2022 hoda my pieryjadyčna źbiralisia na sumiesnyja dziavočyja imprezy».
Žančynu zatrymlivali padčas rejdu vosieńniu 2024 hoda. Joj inkryminavali artykuł 357 Kryminalnaha kodeksa (zmova z metaj zachopu ŭłady), ale aryštu paźbiehnuć udałosia:
«31 kastryčnika zabrali žančyn, jakich ciapier asudzili. A paśla KDB pryjšoŭ da mianie. Mnie adrazu skazali, kab ja raskazvała ŭsio, jak jość, bo Iryna z Anžełaj «užo ŭsio roŭna na doŭhi čas zajeduć». Tady ja zrazumieła, što ich zrabili arhanizatarkami. Supracoŭniki zapytvali mienavita pra žanočy čat: što my rabili ŭ čacie, jakuju aktyŭnaść mieli, kudy jeździli i što rabili. Raspytvali pra kožnuju žančynu z čata. Ja raskazała, što my sapraŭdy časam sustrakalisia, kab źjeździć u muziej, u vandroŭku, razam kupacca, naprykład. Nijakaha kryminału nie było. Heta ŭsio tak daloka ad «zachopu ŭłady».
Paśla dopytu jaje pavieźli ŭ milicyju dla składańnia administracyjnaha pratakołu, a na sudzie vyzvalili, bo ŭ žančyny jość niepaŭnaletnija dzieci. Ciaham dvuch sutak jana pakinuła Biełaruś.
Pavodle žančyny, artykuł 357 Kryminalnaha kodeksa pieršapačatkova stavili ŭ vinu ŭsim zatrymanym pa hetaj spravie žančynam. Vieranika miarkuje, što prasłuchoŭvać mahli paŭhoda ci navat hod.
«Vielmi kryŭdna, što z hetaj spravy zrabili «zmovu z metaj zachopu ŭłady». Kali ja ničoha nie raskazała na dopycie, maładaja śledčaja pryniesła tečku, u jakoj była rasšyfravanaja adna z ZOOM-razmovaŭ, jakaja adbyvałasia letam 2024 hoda. Jak ja zrazumieła, dzieści było ŭstalavanaje prasłuchoŭvańnie, dziakujučy jakomu była zapisana i hetaja razmova, i inšyja. Vidać, Irynu i Anžełu daŭno viali.
Na toj razmovie, adzinaj, na jakoj ja była, abmiarkoŭvalisia haryzantalnyja suviazi i suviazi ź inšymi supołkami. Ja tady jašče pasvaryłasia na hetym zumie, bo kazała: «Jakija suviazi i ŭmacavańni?! Tut ludziam treba niejak vyžyć. Heta plonu nijakaha nie daść, tolki prablemy buduć!» Jak u vadu hladzieła…
Padčas našaj dyskusii adna z žančyn skazała niešta nakštałt: «Tamu ŭ nas ničoha nie atrymlivajecca, što my nie ŭmiejem vybudoŭvać haryzantalnyja suviazi, i navat kali pieramožam ci źmienicca ŭłada, to ŭ nas ničoha nie źmienicca z hetaj pryčyny». Tamu nam stavili ŭ vinu artykuł 357 Kryminalnaha kodeksa. Na heta ja kazała supracoŭnikam KDB: «Surjozna? Hetyja žančyny starejšyja za 50 hadoŭ — i zachop ułady?»
Stali viadomyja proźviščy ŭsich žančyn, jakich asudzili da vialikich terminaŭ pa spravie «dvarovych čataŭ»
Adnu z žančyn pa spravie «dvarovych čataŭ» asudzili na 10 hadoŭ
Trom minčankam dali pa 8‑9 hadoŭ pa spravie dvarovych čataŭ
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie
Buchhałtarku ź Minska asudzili na 8,5 hoda pa spravie «dvarovych čataŭ»
Kamientary