Pasoł Surykaŭ raspavioŭ, što buduć rabić rasijskija vojski paśla vučeńniaŭ u Biełarusi
U vučeńniach «Zachad-2017» u Biełarusi buduć udzielničać try tysiačy rasijskich vajskoŭcaŭ, jakija pakinuć biełaruskuju terytoryju adrazu paśla zakančeńnia vučeńniaŭ. Pra heta zajaviŭ pasoł Rasii Alaksandr Surykaŭ, kamientujučy na pres-kanfierencyi roznyja zaściarohi nakont vučeńniaŭ.
— Usiaho ŭ vučeńniach na palihonach Biełarusi voźmuć udzieł da 13 tysiač vajskoŭcaŭ, ź ich try tysiačy — rasijskich. Buduć adpracoŭvacca vučebna-bajavyja zadačy abarončaha charaktaru. Vy, presa, u kursie, jakija kulbity vyvaročvajuć niekatoryja ŚMI vakoł hetych vučeńniaŭ. Časam prosta soramna stanovicca, što takija dumki mohuć uźnikać.
Pasoł Rasii adprečyŭ usie padazreńni ŭ tym, što rasijskija vojski mohuć zastacca ŭ Biełarusi paśla vučeńniaŭ.
— Kaliści stajała pytańnie ab vyvadzie biełaruskich vajskoŭcaŭ, kali vučeńni prachodziać na rasijskim baku, abo što jany akupujuć Rasiju? Tak i tut, pavodle mižuradavaha pahadnieńnia, paśla vučeńniaŭ vojski adrazu vyvodziacca pa chatnich kvaterach. Da zimy treba rychtavacca, čaho jany tut buduć siadzieć?
Kamientujučy padazreńni, jakija fihuravali ŭ presie, ab tym, što Rasieja moža ŭvieści bolš vajennych, čym płanujecca, Surykaŭ paćvierdziŭ, što ličba ŭ try tysiačy kančatkovaja. «Nu moža być 3001 ci 2999, takoje byvaje», — adznačyŭ pasoł.
Sumnievy ŭ tym, što rasijskija vajskoŭcy mohuć syści ź Biełarusi paśla vučeńniaŭ, vykazvali pradstaŭniki krain Bałtyi, a taksama niekatoryja analityki. Biełaruskaje i rasijskaje kiraŭnictva šmatkroć abviarhała hetyja viersii. Alaksandr Łukašenka zaprasiŭ na vučeńni «Zachad-2017» naziralnikaŭ NATA.
Ciapier čytajuć
Što robiać ź biełarusami, jakich aryštavali, ale nie paśpiavajuć asudzić za pratesty. Jość dva šlachi6
Kamientary