«Ja nie mahu addać 10 tysiač jeŭra za niezrazumieły ŭryvak u 4 siekundy». Što za videa Mielnikavaj sprabujuć uciuchać Lavončyku i Cichanoŭskamu?

Dva tydni tamu nieviadomaja, jakaja prosić nazyvać jaje Mandarynkaj, dasłała kiraŭniku ByHelp videa i skrynšot z žančynaj, padobnaj da Anžaliki Mielnikavaj. Pa jaje słovach, Mielnikava znachodzicca ŭ Biełarusi razam sa svaimi dziećmi.

Hetyja kadry bačyŭ taksama Siarhiej Cichanoŭski.

Adpraŭnica paabiacała dasłać uvieś najaŭny ŭ jaje materyjał, kali Lavončyk zapłacić abiacanuju ŭznaharodu ŭ 10 tysiač jeŭra, ale toj «pierastaŭ vychodzić na suviaź». Jak śćviardžaje sam Alaksiej — zusim nie tamu, što jamu škada rastavacca z hrašyma.

«Ja patłumačyŭ, što kali patrebny hrošy, niachaj dašle videa całkam z tłumačeńniem, dzie i kali jaho zdymali, a kali jana praciahnie zakidvać mianie niezrazumiełymi skrynšotami, ja nie budu ź joj razmaŭlać. Paśla hetaha mnie dasłali ŭryvak videa na čatyry siekundy, ź jakoha taksama ničoha nie zrazumieła. Za kustami niejkaja žančyna kosić hazonakasiłkaj travu i na hetym — usio», — kaža Lavončyk.

Na skrynšocie, jaki adpraŭnica dasłała Lavončyku, vyrazana vierchniaja častka fihury žančyny z tatuiroŭkaj, jak u Mielnikavaj, ale vyjava mocna razmytaja.

Jon kaža, što adzinaje, za što možna było začapicca z taho videa — heta toje, što jano zdymałasia z-za kustoŭ. Jon by moh pierakanacca ŭ sapraŭdnaści kadraŭ, ale dla hetaha treba bolš infarmacyi — naprykład, kali jano zdymałasia, hieałakacyja, inšyja videa.

«Kali adpraŭnica choča atrymać hrošy ci dabicca praŭdy, chaj dasyłaje videa całkam. Ja nie mahu addać 10 tysiač jeŭra za niezrazumieły ŭryvak u čatyry siekundy. Kali jana mnie nie daviaraje, kab dasłać dastatkova infarmacyi, značyć ja taksama nie budu joj daviarać», — kaža Lavončyk.

Pavialičyć

Paśla razmovy z Alaksiejem Lavončykam, «Jeŭraradyjo» jašče raz źviazałasia z Mandarynkaj. Akazałasia, što frahmient videa, jaki jana dasłała ŭ redakcyju, i frahmient, jaki atrymaŭ kiraŭnik ByHelp — heta dva roznyja frahmienty, źniatyja z roznych rakursaŭ (u žurnalistaŭ jość abodva).

Dziaŭčyna dazvoliła pierasłać Alaksieju druhi ŭryvak — tam fihura žančyny, ale krychu bujniejšaja. Jana kosić travu na fonie kuta niejkaj chaty, ale i ŭ hetym vypadku zusim nie zrazumieła, što heta za chata i kali było źniata videa.

Pa słovach adpraŭnicy, na videa bačna tatuiroŭka, jakoj u Mielnikavaj nie było ŭ 2020 hodzie. Heta, ličyć Mandarynka, i pavinna dakazyvać, što zdymałasia jano niadaŭna.

«Tam usio vydatna bačna: što tam jość tatuiroŭka, što heta — Mielnikava, i toje, što jana znachodzicca ŭ Biełarusi (ja vam zaraz heta adkryta kažu i zajaŭlaju — 100%), heta chata jaje baćkoŭ, jana kasiła hazon, hulała ź dziećmi. Na aryhinalnym videa jość jaje dzieci. Skinuć vam heta ŭsio, ci heta taksama fejk ź dziećmi, jakija padraśli? Vy ŭsio chočacie i adrazu? Dyk, moža, čałaviek, jaki pavinien adkazvać za heta hrašyma, pavinien zapłacić?», — pytajecca jana.

Mandarynka dadała, što videa zdymała nie jana, a čałaviek, jaki choča pieravieści hrošy pałku Kalinoŭskaha.

«Viedajučy, što ja dapamahaju dobraachvotnikam, jon dasłaŭ videa mnie, udakładniŭšy da hetaha, ci hatovaja ja hetym zajmacca. Ja nie publičny čałaviek, tamu padklučyła Siarhieja Cichanoŭskaha, jaki ahučyŭ na svaim błozie historyju ź Lavončykam paśla jahonaha 2-tydniovaha maŭčańnia», — tłumačyć Mandarynka.

Dasyłać videa całkam jana nie choča, tamu što baicca, što Lavončyk nazavie jaho fejkam i nie zapłacić, i tamu što chvalujecca za biaśpieku čałavieka, jaki jaho zdymaŭ.

Na heta Lavončyk adkazvaje:

«Ja zusim nie razumieju łohiku. Kali ŭ čałavieka jość praŭdzivy materyjał, jon moža jaho dasłać. Navat, kali jon mnie nie daviaraje, u jaho ŭsio roŭna jość šaniec atrymać uznaharodu. Kali videa budzie apublikavana da taho, jak ja budu hatovy vypłacić niejkuju dapamohu, heta budzie aznačać, što nijakaj uznaharody nie budzie.

Ja prosta viarnu hetyja hrošy i ŭsio. Patrabavać 10 tysiač jeŭra za videa ŭ čatyry siekundy i pry hetym kazać pra niedavier da mianie — nu, sorry…».

«Jeŭraradyjo» pahladzieła abodva ŭryŭki ź piersonaj, padobnaj da Mielnikavaj. Usio, što vidać na zadnim płanie — kut niejkaj pryvatnaj chaty, tamu zrazumieć, dzie mienavita źniata, niemahčyma.

Miarkujecca, što na videa taja ž tatuiroŭka, što i ŭ eks-śpikierki KS, ale jana zrabiła takuju ​​dva hady tamu, to bok rolik moh być zapisany i ŭ Varšavie, pišuć žurnalisty.

Abodva videa raspłyvistyja: tak, dziaŭčyna moža akazacca Anžalikaj, ale sa stoadsotkavaj upeŭnienaściu kazać nielha. Roznyja ŭryŭki źniaty z roznych rakursaŭ: to bok možna zdahadacca, što apieratar aściarožna abychodziŭ płot i tak zdymaŭ.

Mietadannyja z časam i hieałakacyjaj videa Mandarynka žurnałsitam nie dasłała.

Niekalki krynicaŭ «Jeŭraradyjo» u Niaśvižy śćviardžajuć, što dziaciej Mielnikavych niadaŭna bačyli. Adnak pra samu Anžaliku nichto nie havoryć. 

Taksama redakcyja pytajecca: čamu tady Mandarynka nie prosić, kab toj ža Lavončyk, dla jakoha heta zusim biaśpiečna, sam adpraviŭ danat pałku Kalinoŭskaha i padaŭ dokazy, što heta zrabiŭ?

• 4
• 0
• 8
• 4
• 1
• 0
• 1
• 0