Deputaty irłandskaha parłamienta zaćvierdzili kandydaturu lidara partyi «Finie Heł» Lea Varadkara na pasadu premjer-ministra krainy. 38-hadovy palityk staŭ samym maładym premjeram u historyi Irłandyi.
Akramia taho, Varadkar staŭ pieršym lidaram krainy, što adkryta abviaściŭ pra svaju homasieksualnaść, i pieršym premjeram Irłandyi indyjskaha pachodžańnia.
«Mianie vybrali, kab kiravać, ale ja abiacaju słužyć. Moj urad nie budzie ni levym, ni pravym, bo hetyja sastarełyja paniaćci nie spraŭlajucca z palityčnymi vyklikami siońniašniaha dnia. Meta majho ŭrada — pabudavać respubliku mahčymaściaŭ», - zajaviŭ Varadkar, vystupajučy pierad parłamientam.
Paśla hetaha jon adpraviŭsia ŭ rezidencyju prezidenta Irłandyi Majkła Chihinsa, z ruk jakoha atrymaŭ atrybut vykanaŭčaj ułady - «ofisnuju piačatku».
«Jak samy małady premjer krainy, jon [Varadkar] budzie havaryć za novaje pakaleńnie naroda Irłandyi. Jon pradstaŭlaje sučasnuju i raznastajnuju Irłandyju i adkazvaje za jaje jak nichto inšy», - skazaŭ papiarednik Varadkara Enda Kieni, sastupajučy svaju pasadu.
2 červienia Varadkar atrymaŭ pieramohu na ŭnutrypartyjnych vybarach, atrymaŭšy 60% hałasoŭ i apiaredziŭšy svajho hałoŭnaha kankurenta Sajmana Kavenieja. «Kali majo abrańnie siońnia niešta značyć, tak heta toje, što respublika volnaja ad zababonaŭ», - zajaviŭ tady Varadkar.
Varadkar naradziŭsia ŭ siamji irłandskaj miedsiastry i doktara ź Indyi. Baćka novaha premjera pierajechaŭ u Irłandyju ŭ 1970-ch hadach, kali hetaja kraina ličyłasia adnoj z samych kansiervatyŭnych u Jeŭropie.
U 2015 hodzie, kali ŭ Irłandyi prachodziŭ refierendum pa lehalizacyi adnapołych šlubaŭ, Varadkar abviaściŭ, što jon hiej.
Irłandyja doŭhi čas ličyłasia adnoj z samych niehatyŭna nastrojenych da ŁHBT-supolnaści krain Jeŭropy - da 1993 hoda homaseksualnaść u krainie była pa-za zakonam.
Ciapier čytajuć
Zahinuŭ biełaruski dobraachvotnik Alaksiej Łazaraŭ10
Kamientary