Viadučaja niamieckaja avijakampanija «Lufthanza» adnoj ź pieršych adreahavała na ŭčorašniuju zajavu Alaksandra Łukašenki adnosna mahčymaj zabarony dla zachodnich samalotaŭ lacieć praź biełaruskuju terytoryju.
Jak zajaviŭ «Svabodzie» adkazny supracoŭnik «Lufthanzy» ŭ suviaziach z presaj Tomas Jachna, uviadzieńnie padobnaj zabarony jość hrubym parušeńniem mižnarodnaha prava, a taksama dvuchbakovych pahadnieńniaŭ, jakija zaklučanyja pamiž Niamieččynaj i Biełaruśsiu.
(Jachna: ) «Što tyčycca zajavy spadara Łukašenki, ź jakoj my paznajomilisia z učorašniaj presy, to ŭsio heta vyhladaje jak šlach da pravavoha parušeńnia, pakolki pamiž Niamieččynaj i Biełaruśsiu na praciahu dziesiacihodździaŭ isnujuć dvuchbakovyja pahadnieńni, jakija tyčać i pieralotaŭ praz pavietranuju prastoru abiedźviuch krainaŭ. Uvieś hety čas hetyja pahadnieńni vielmi paśpiachova j vielmi stroha vykonvalisia. Kali ŭsio heta adbudziecca nasamreč, to na vydatkach samoj «Lufthanzy» heta nijak nie adabjecca. My prosta budziem rabić našyja trochrazovyja štodzionnyja maršruty ŭ Rasieju nie praź Biełaruś. Heta budzie na niekalki chvilinaŭ daŭžej, čym zvyčajna, adnak istotna nie adabjecca na koštach našych kvitkoŭ. Što da pravavoha boku spravy, to ŭ hetym vypadku budzie vielmi žorstkaja ŭ adkaz reakcyja niamieckaha MZS».
Pavodle spadara Jachny, učorašniaja zajava biełaruskaha kiraŭnika vyklikała vialikuju tryvohu siarod pradstaŭnikoŭ dziełavych kołaŭ, jakija majuć biznes u Biełarusi. Dla ich štodzionnyja rejsy «Lufthanzy» ŭ Miensk vielmi zručnyja.
(Jachna: ) «Pra zabaronu rejsaŭ na Miensk biełaruski kiraŭnik ničoha nie skazaŭ, i ja dumaju, što jon nie zachoča, jak kažuć, siekčy suk na drevie, na jakim siadzić. Štodzionnyja rejsy «Lufthanzy» ŭ Miensk majuć vialikaje značeńnie dla biełaruskaj ekanomiki. I kali razmova pojdzie pra heta, to biełaruskaje kiraŭnictva vyrakaje svaju krainu na poŭnuju samaizalacyju».
Kamientary