Pačaŭsia zbor podpisaŭ za ŭšanavańnie pamiatnych miescaŭ, źviazanych z BNR
25 sakavika 2018 hoda budzie adznačacca 100-hodździe z dnia abviaščeńnia niezaležnaści Biełaruskaj Narodnaj Respubliki. Biełaruskija aktyvisty prapanujuć ušanavać jaje pamiać i na budynkach, źviazanych ź dziejnaściu BNR, ustalavać pamiatnyja doški i bieł-čyrvona-biełyja ściahi.
U pryvatnaści, heta prapanujuć zrabić na nastupnych budynkach:
- Na budynku Minskaha haradskoha teatra (ciapier Nacyjanalny akademičny teatr imia Janki Kupały, vuł. Enhielsa, 7), dzie 5—17 śniežnia 1917 hoda Vialikaj biełaruskaj radaj byŭ praviedzieny Pieršy Usiebiełaruski kanhres;
- Na byłym Domie hubiernatara (ciapier Respublikanski muzyčny kaledž, pł. Svabody, 7), dzie 21 lutaha 1918 hoda Rada Usiebiełaruskaha źjezda pryniała pieršuju Ustaŭnuju hramatu da narodaŭ Biełarusi, u jakoj zaklikała biełaruski narod ździejśnić svajo prava na «poŭnaje samavyznačeńnie», a nacyjanalnyja mienšaści — na nacyjanalna-piersanalnuju aŭtanomiju;
- Na domie Malina (vulica Vaładarskaha, 9), dzie 24 sakavika 1918 hoda ŭ kabiniecie staršyni Narodnaha sakrataryjata Jazepa Varonki pačałosia pasiadžeńnie Rady BNR, jakoje zakončyłasia 25 sakavika pryniaćciem Treciaj Ustaŭnoj hramaty, jakaja abviaściła Biełaruś volnaj i niezaležnaj dziaržavaj;
- Na domie Volina (vulica Vaładarskaha, 12), u jakim z 25 lutaha 1918 hoda pracavała Biełaruskaje narodnaje pradstaŭnictva na čale z Ramanam Skirmuntam;
- Na Jubilejnym domie (praśpiekt Niezaležnaści, 26), u jakim z 17 žniŭnia 1918 hoda zasiadała Rada BNR (usie ŭ Minsku);
- Na domie kupca Muraŭjova ŭ Hrodnie (płošča Savieckaja, 2), u jakim zasiadała Rada BNR paśla adjezdu ź Minska.
- Na budynku byłoha akruhovaha suda ŭ Mahilovie (ciapier Mahiloŭski abłasny krajaznaŭčy muziej, płošča Słavy, 1), dzie 12 lipienia 1918 na schodzie, jaki adbyŭsia ź inicyjatyvy Mahiloŭskaha nacyjanalnaha kamiteta, pradstaŭniki hramadskaści Mahilova pryznali ŭ horadzie ŭładu BNR.
Zbor podpisaŭ za ŭšanavańnie pamiaci pra Biełaruskuju narodnuju respubliku praciahniecca da 12 śniežnia na internet-placoŭcy petitions.by. Paśla płanujecca pieradać ich u Minharvykankam i Ministerstva kultury.
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami44
Kamientary