Jak nastaŭnik musić pavodzić siabie ŭ sacsietkach? Abmiarkoŭvajcie!
Sacsietki ŭvajšli ŭ žyćcio ŭsich biełarusaŭ — i maładych, i darosłych. I kali ŭ škole ci ŭniviersitecie dystancyja pamiž pakaleńniami pa-raniejšamu zachoŭvajecca, to ŭ internecie jana imkliva skaračajecca.
Što ž rabić, kali vučań kamientuje zdymak nastaŭnicy z adpačynku: «Klova vyhladajecie!)))»
Jak praviła, piedahohi abirajuć adnu ź dźviuch asnoŭnych linij pavodzin.
Varyjant A: praduchilajuć padobnuju situacyju. U takim razie nastaŭnik całkam ihnaruje svaich vučniaŭ. Nie dadaje ŭ siabry, nie pierapisvajecca ź imi, nie abmieńvajecca «łajkami», to bok za dźviaryma škoły kamunikacyja spyniajecca.
Varyjant B: pahadžajucca z praviłami hulni internet-pakaleńnia vučniaŭ. Taki nastaŭnik sa svaimi vučniami na karotkaj nazie. Nahadvaje pra chatniaje zadańnie, kamientuje fota sa školnaha kancerta, adkazvaje na pytańni, jakija dzieci adrasujuć jamu ŭ pryvat, — to bok usialak padtrymlivaje suviaź i sočyć za tym, čym žyvie jaho kłas.
Na dumku ekśpierta ŭ hetaj temie, kandydata psichałahičnych navuk, pazaštatnaj supracoŭnicy rasijskaha Fondu raźvićcia internetu, dacenta Viktoryi Izmahuravaj, druhi varyjant našmat bolš prahresiŭny. Tak, pieršy taksama maje peŭnyja plusy: vučyć pavažać asabistuju prastoru, bierahčy ŭłasnaje žyćcio ad čužych vačej. Ale pry pravilnym pazicyjanavańni ŭ internecie, dla nastaŭnika sacsietki mohuć być mocnym i ŭpłyvovym dadatkovym instrumientam vychavańnia. Akramia taho, heta vydatnaja mahčymaść adšukać ź dziećmi supolnuju movu, naładzić adnosiny.
Naturalna, paŭstaje pytańnie: što takoje «pravilnaje pazicyjanavańnie»? Dzie miaža taho, što moža sabie dazvolić nastaŭnik u kamunikacyi z vučniami ŭ internecie? Što moža publikavać na svajoj staroncy, a što nie? Ci ŭvohule asabistuju staronku nastaŭnika možna ličyć «asabistaj»? I jak nie zhubić u vačach dziaciej aŭtarytet? Praviłaŭ niama, jany nidzie nie zafiksavanyja, ale ŭžo vypracavanyja peŭnyja schiemy, šabłony, unutranaja etyka.
Pra heta siarod inšaha pojdzie razmova 29—30 listapada ŭ Minsku na I Mižnarodnaj śpiecyjalizavanaj navukova-techničnaj vystavie-forumie «Infarmacyjnyja technałohii ŭ adukacyi» — ITE-2017. Lekcyj zapłanavana šmat, adna ź ich, jakuju arhanizoŭvaje kampanija MTS u miežach pahadnieńnia ź Ministerstvam adukacyi Biełarusi, pryśviečanaja jakraz adkaznym pavodzinam nastaŭnikaŭ u internecie. Lektar — zhadanaja vyšej Viktoryja Izmahurava.
Letaś Viktoryja ŭžo vystupała z hetaj temaj na sieminary ŭ Minskim instytucie raźvićcia adukacyi, i byŭ sapraŭdny anšłah — pasłuchać jaje pryjšli 150 nastaŭnikaŭ-praktykaŭ, a taksama psichołahaŭ z usich rajonaŭ Minska.
Sioleta arhanizatary vyrašyli dać mahčymaść kožnamu zadać svaje pytańni lektaru. Tamu pišycie ŭ kamientarach, što vas cikavić, a my zapytajemsia pra heta ŭ vystupoŭcy i nadrukujem adkazy.
Kamientary