U pačatku tydnia ministr abarony Andrej Raŭkoŭ pravioŭ pryjom hramadzian u Barysavie. Siarod tych, chto trapili da ministra, byli pradstaŭniki kampanii «Havary praŭdu» Andrej Dźmitryjeŭ i Taćciana Karatkievič.
Praź niekalki dzion na aficyjnym sajcie Minabarony źjaviŭsia adkaz «Havary praŭdu». Viedamstva aburyłasia, što ŭ adnym ź intervju Taćciana Karatkievič skazała, što Ministerstva nie dało adkaz na prapanovy ab uviadzieńni vajskovaha ambudsmiena, arhanizacyi niezaležnaj haračaj linii dla vajskoŭcaŭ, a taksama stvareńni kansultacyjnaj rady pry Ministerstvie abarony.
Minabarony pryjšło da vysnovy, što prapanovy «Havary praŭdu» źjaŭlajucca niekampietentnymi. U viedamstvie śćviardžajuć, što vajskovyja psichołahi vyzvalenyja ad biurakratyčnaj pracy, a tamu mohuć zasiarodzicca tolki na pracy z asabistym składam.
Što tyčycca stvareńnia «apiakunskaj rady», to na dumku viedamstva, supracoŭnictva z hramadskimi arhanizacyjami i tak naładžana.
«Prapanova ab kamplektavańni padraździaleńniaŭ vajskoŭcami terminovaj vajennaj słužby adnaho pieryjadu nie apraŭdałasia ŭ najnoŭšaj historyi. Z kanca 70-ch hadoŭ minułaha stahodździa ŭ Savieckaj Armii sproby stvareńnia padraździaleńniaŭ z vajskoŭcaŭ adnaho pieryjadu słužby nie mieli vyniku. Jany nie pryviali da źnižeńnia pravaparušeńniaŭ, ale pry hetym paŭstała niamała prablem u padtrymańni nieabchodnaha ŭzroŭniu bajavoj hatoŭnaści kankretnych padraździaleńniaŭ», — havorycca ŭ adkazie.
«Pytańnie ab źmienie zakanadaŭstva ŭ bok vyzvaleńnia ad kryminalnaj adkaznaści za samavolnaje pakidańnie vajskovaj častki ŭ suviazi z «dziedaŭščynaj» śviedčyć pra toje, što ekśpierty słaba viedajuć zakanadaŭstva Respubliki Biełaruś. Ad 2005 hoda ŭ Kryminalnym kodeksie Respubliki Biełaruś isnuje norma, u adpaviednaści ź jakoj, asoba, jakaja maje status vajennasłužačaha, jakaja ŭpieršyniu ŭčyniła dziejańni, praduhledžanyja artykułam 445 («Samavolnaje pakidańnie čaści abo miesca słužby»), moža być vyzvalena ad kryminalnaj adkaznaści, kali zroblenaje źjaviłasia śledstvam źbiehu ciažkich abstavinaŭ», — pišacca na sajcie Minabarony.
Što tyčycca skaračeńnia terminu słužby, to na dadzieny momant heta «nie pradstaŭlajecca mahčymym».
Kamientary