Adzin z hałoŭnych brytanskich ekśpiertaŭ pa SSSR byŭ savieckim ahientam
Devid Fłojd, jakoha ŭ Vialikabrytanii nazyvali adnym z samych kampietentnych ekśpiertaŭ pa SSSR, u 1950-ja hady byŭ złoŭleny na špijanažy na karyść Maskvy. Adnak zamiest turmy jon adpraviŭsia ŭ Daily Telegraph.
Jak paviedamlaje hazieta Times sa spasyłkaj na rassakrečanyja źviestki MZS Vialikabrytanii, były karespandent Daily Telegraph Devid Fłojd, jaki ličyŭsia adnym z hałoŭnych brytanskich ekśpiertaŭ pa palitycy Kramla, adzin čas pracavaŭ na savieckuju vyviedku. Heta vyśvietliłasia ŭ 1951 hodzie, kali Fłojd pracavaŭ u Foreign Office. Tady ŭłady Złučanaha Karaleŭstva vykryli dvuch vysokapastaŭlenych supracoŭnikaŭ u MZS - Haja Bierdžesa i Donalda Maklina (abodva źbiehli ŭ SSSR).
U MZS Vialikabrytanii naładzili pravierku, i Fłojd, jaki doŭhi čas pracavaŭ u pasolstvach u SSSR, Čechasłavakii i Juhasłavii, pryznaŭsia, što ŭ kancy Druhoj suśvietnaj vajny pieradavaŭ sakretnuju infarmacyju savieckim pradstaŭnikam. Tady ž vyśvietliłasia, što padčas pryjomu Fłojda na pracu ŭ Łondanie nie ŭličyli toj fakt, što, byŭšy studentam u Oksfardzie, toj ahitavaŭ za kamunistaŭ.
U Foreign Office mierkavali, što Fłojd moh pieradavać sakretnuju infarmacyju i padčas pracy ŭ Prazie i Białhradzie, adnak vakoł jaho nie stali padymać skandał, paličyŭšy, što dokazaŭ niedastatkova. Fłojda zvolnili z MZS, adnak u rassakrečanych dakumientach jość zhadka, što dypłamatam zacikaviłasia raźviedka MI5, «jakaja vyrašyła znajści jamu pracu». Užo praź niekalki miesiacaŭ Fłojd uładkavaŭsia ŭ Daily Telegraph, kiraŭnictva jakoj, jak vyśvietliłasia paźniej, pracavała na brytanskija śpiecsłužby.
Fłojd pamior u 1997 hodzie, zachavaŭšy ŭ tajamnicy skandał pačatku 1950-ch. Jaho žonka ŭ intervju Times skazała, što ničoha nie viedała pra minułaje muža.
Historyk Džonatan Chasłam ź instytuta ŭ amierykanskim Prynstanie ličyć, što ŭ MZS Vialikabrytanii schavali infarmacyju ab zdradzie Fłojda, bo nie chacieli, kab ab hetaj historyi daviedalisia amierykancy. U Vašynhtonie mahli razzłavacca, što zanadta šmat ludziej u zamiežnapalityčnym viedamstvie Vialikabrytanii pracavali na Maskvu, što paškodziła b dvuchbakovym adnosinam.
Kamientary