Adrazu dziasiatak rehijanalnych supołak Ukantakcie apytaŭ ludziej, ci chočuć jany ŭ skład Rasii. Vyniki mohuć vas ździvić
Adrazu ź dziasiatak rehijanalnych supołak u sacyjalnaj sietcy Ukantacie ŭ adzin čas pravodzili adnolkavuju apytanku: «Ci chočacie vy ŭ skład Rasii?».
Pryčynaj dla hetaha stała vykazvańnie lidara rasijskaj partyi ŁDPR Uładzimira Žyrynoŭskaha pra toje, što bolšaść žycharoŭ Biełarusi padtrymaje dałučeńnie krainy da ŭschodniaj susiedki.
Admietna, što ŭsie hetyja dopisy byli zroblenyja ŭ adnolkavaj stylistycy. Z adnaho boku, heta moža ŭkazvać na niejkuju zamovu, z druhoha — administratary supołak prosta ślepa kapijujuć idei adno adnaho. Darečy, admietna, što amal paŭsiul pieršym išoŭ varyjant «za» dałučeńnie da Rasii.
Tym nie mienš na dadzienyja hetych apytanak stali spasyłacca ŭžo niekatoryja rasijskija vydańni.
U supołcy «Tvoj Minsk» prahałasavała 2500 čałaviek. 76,5% z apytanych vystupajuć za zachavańnie niezaležnaści. Mabyć, dla stalicy heta nie duža niezvyčajnyja ličby.
Padobny pracent prychilnikaŭ suvierenitetu krainy ŭ Breście. U apytańni supołki «BrestSici» ŭziało ŭdzieł 1280 karystalnikaŭ Ukantakcie. Ź ich — 73% za niezaležnaść krainy.
A voś najhoršy pakazčyk u Viciebsku. Častka supołki «Nietypovy Viciebsk» nie abrała ni varyjant niezaležnaści, ni varyjant dałučeńnia, a prosta zachacieli pahladzieć na vyniki apytańnia. Ale ŭsio ž varyjant dałučeńnia nabraŭ najbolšuju padtrymku — 39%.
Nie lepšaja situacyja nazirajecca i ŭ jašče adnoj viciebskaj supołcy «Heta Viciebsk, dzietka». Tut taksama bolšaść hałasuje za ŭstupleńnie ŭ skład Rasii.
Nie našmat lepšaja situacyja ŭ Barysavie. Ale ŭ supołcy «Typovy Barysaŭ» usio ž 56% apytanych (usiaho 2600) ličać, što Biełaruś pavinna zastacca niezaležnaj krainaj.
U Homieli bolšaść abrała šlach u Jeŭrasajuz, kali ich abjadnać z tymi, chto za «asablivy šlach», to atrymajecca bolš za 60%. Za abjadnańnie z Rasijaj mienš za 40%.
U supołcy słuckaha «Kurjera» 38% apytanych ličać, što našaj krainie nikudy dałučacca nie varta. 23% fatalistyčna adkazali, što biełarusy zrobiać usio tak, jak im skažuć. 25% ličyć, što my i tak de-fakta ŭ składzie Rasii. A 13% aptymistaŭ adkazvajuć pra toje, što «niachaj Rasija ŭvachodzić u skład Biełarusi».
Urešcie, u supołcy «Padsłuchana Pružany», pra jakuju my pisali raniej, 72% respandentaŭ vystupajuć za zachavańnie niezaležnaści.
Admietna, što najbolš hałasoŭ było addadziena ŭ supołcy partała Tut.by. Tam prahałasavała bolš za 10 tysiač čałaviek. I bolš za 80% vystupajuć suprać dałučeńnia da Rasii.
Ciapier čytajuć
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary