Pahladzicie, jakuju šykoŭnuju kalekcyju nacyjanalnych strojaŭ pašyli vučanicy 50-j minskaj himnazii FOTAFAKT
Pad kiraŭnictvam kłasnaj i nastaŭnicy pracoŭnaha navučańnia 8-kłaśnicy z 50-j staličnaj himnazii pašyli cełuju kalekcyju sukienak, natchnionyja nacyjanalnym arnamientam i simvolikaj.
U himnazii biahučy tydzień byŭ całkam pryśviečany biełaruskaj movie i kultury. Siońnia na ŭsich pierapynkach u kalidorach hučali biełaruskija vieršy i pieśni, a padčas adnaho ź ich dziaŭčaty z 8 «A» i 8 «B» pradefiliravali ŭ sukienkach ź biełaruskaj simvolikaj, pašytych svaimi rukami na pracoŭnych zaniatkach.
Pa słovach śviedak, madelaŭ sustrakali burnymi avacyjami, a sami dziaŭčaty ciapier nie chočuć zdymać ź siabie abnoŭki.
Kuryravali ŭvieś hety praces kłasnaja kiraŭnica Iryna Mielnikava i nastaŭnica pracy Alena Pałaškievič. Apošniaja i navučyła dziaŭčat usim sakretam šyćcia i vyšyŭki.
«Dla mianie, jak i dla vučanic, zadača pašyć nacyjanalnuju sukienku była pastaŭlenaja ŭpieršyniu. U 6-m kłasie my sa školnicami vyšyvajem survetki, ale nie bolš za toje. Za natchnieńnie my ŭziali biełaruskija arnamienty z roznym sensam — maci, soniejka, viasna (samo saboj, pra kožny ź ich na zaniatkach raspaviadali dziaŭčatam, kab prystuničaŭ i adukacyjny momant). Metaj było nie stracić tradycyjny sens, ale pry hetym zrabić sučasny kroj, takija madeli, jakija padabajucca siońniašniaj moładzi», — raspaviadaje Alena Piatroŭna.
U rasparadžeńni ŭ školnic było ŭsiaho try tydni: prychodziłasia źbiracca i ŭviečary, i zranku, kab usio paśpieć. Dobraj pradziusarkaj u hetych umovach stała kłasnaja kiraŭnica 8 «A», pry dapamozie jakoj vyrašalisia pytańni z hrafikam, zboram hrošaj i nabyćciom tkaniny baćkami.
Praces byŭ taki zachaplalny, što navat niekatoryja chłopcy zachacieli taksama navučycca šyć niešta padobnaje, pastajanna zalatali ŭ kłas, dzie išoŭ tvorčy praces nad mašynkami.
Spačatku tkanina abkidvałasia ŭručnuju, potym — usio adšyvałasia na mašyncy. Dla azdableńnia vykarystoŭvali taśmu i bujnyja šarścianyja nitki.
«Ja sama nie čakała, što hetaje zadańnie vykliča ŭ dziaŭčat taki impet. Było bačna, jak hareli ich vočy. Tyja, chto siońnia hładzieŭ na vynik, kazali, što my prynieśli ŭ škołu sapraŭdny biełaruski duch, chadzili ščaślivyja i z dobrym nastrojem — akazvajecca, dla hetaha treba niašmat», — padzialiłasia z «NN» Alena Pałaškievič.
Na žal, pakinuć sabie hetuju pryhažość školnicy nie zmohuć: pa sukienki ŭžo vystraiłasia čarha z tych, chto žadaje vykarystać ich na kancertach i inšych mierapryjemstvach. Ale ciapier jany mohuć pašyć sabie takich kolki zaŭhodna. U siarednim košt pytańnia adnoj sukienki — kala 100 rubloŭ.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA5
Kamientary