Statkievič raspavioŭ, što dumaje nakont farmatu adznačeńnia Dnia Voli ŭ hetym hodzie
Lidar Biełaruskaha nacyjanalnaha kanhresu Mikałaj Statkievič ličyć haniebnaj situacyju, što skłałasia vakoł śviatkavańnia Dnia Voli — 2019.
Jak raspavioŭ palityk u intervju belsat.eu, BNK farmalnaje rašeńnie nakont farmatu adznačeńnia Dnia Voli prymie ŭ čaćvier, ale sam Statkievič nie bačyć sensu ŭ dałučeńni da arhanizacyi kancertu ŭ Horadni abo ŭ Kijeŭskim skviery ŭ Miensku.
Ładzić asobnyja akcyi BNK pakul taksama nie płanuje.
Pavodle Statkieviča, hod tamu častka demakratyčnaj apazicyi faktyčna «zdała palityčny składnik Dnia Voli, jaki byŭ zaŭsiody»: jany admiežavalisia ad pratestnaj akcyi na płoščy Jakuba Kołasa i zasiarodzilisia vyklučna na arhanizacyi śviatočnaha kancertu, na jakim sami zabaranili palityčnyja łozunhi.
«Mienšaść arhkamitetu nasupierak ahulnamu rašeńniu pabiehła damaŭlacca z čynoŭnikami i zdała palityčny składnik, jaki byŭ zaŭsiody, jaki patrebny, i padstavili tych, chto ŭsio ž pajšoŭ na pratestnuju akcyju. Hod tamu ja napisaŭ, jak adbudziecca BNR-101: navučanyja horkim dośviedam, BNK z hetymi ludźmi, jakimi nieviadoma chto kiruje, u arhkamitet nie pojdzie. A biez nas im niama čaho pradavać — niama na što mianiać svaje kancerty. Tamu ich zvykła pašluć na «banhałor» — i jany tudy zvykła pojduć. Na žal, moj prahnoz spraŭdziŭsia. Adny pajšli ŭ Kijeŭski skvier z druhoha boku Banhałoru. A inšyja pajechali na miascovy «banhałor» u Horadni», — kaža Statkievič.
Kamientary