U Čarnahoryi rasijskich špijonaŭ asudzili za sprobu dziaržaŭnaha pieravarotu na 12 i 15 hadoŭ turmy

Eduard Šyšmakoŭ i Uładzimir Papoŭ, jakich ułady Čarnahoryi padazrajuć u pracy na HRU (Hałoŭnaje raźviedvalnaje ŭpraŭleńnie, rasijskaja vajennaja vyviedka — NN), atrymali samyja praciahłyja terminy - 15 i 12 hadoŭ pazbaŭleńnia voli. U zale jany adsutničali.

U Čarnahoryi sud vynies prysud fihurantam spravy ab sprobie dziaržaŭnaha pieravarotu ŭ krainie ŭ 2016 hodzie. 

Dvoje hramadzian Rasii, Eduard Šyšmakoŭ i Uładzimir Papoŭ, atrymali samaje ciažkaje pakarańnie - 15 i 12 hadoŭ źniavoleńnia adpaviedna. Usiaho vinavatymi byli pryznanyja 12 fihurantaŭ spravy. Siarod asudžanych - lidary čarnahorskaha apazicyjnaha «Demakratyčnaha frontu» Andrej Mandzič i Miłan Kniaževič. Jany byli asudžanyja da piaci hadoŭ pazbaŭleńnia voli. Usich fihurantaŭ pryznali vinavatymi ŭ stvareńni złačynnaj arhanizacyi i teraryźmie. 

«U svajoj dziejnaści złačynnaja arhanizacyja była hatovaja ŭžyvać hvałt i zapałochvańnie. Pry hetym usie adkaznyja asoby viedali ab svaich dziejańniach, žadali ich ździajśnieńnia, viedajučy, što ich dziejańni byli niezakonnymi», - havorycca ŭ vierdykcie suda.

Prysud rasijanam byŭ vyniesieny zavočna.

U Padhorycy ličać, što padčas vybaraŭ u parłamient 16 kastryčnika 2016 hoda płanavaŭsia dziaržpieravarot. Prakuror zajaviŭ u pačatku listapada, što złačynnaja hrupa, u jakoj byli «nacyjanalisty z Rasii», płanavała zabić premjera Miła Džukanaviča. «Kryminalnaja hrupa była sfarmiravana na terytoryi Čarnahoryi, Sierbii i Rasii, a metaj jaje było ździejśnić terarystyčny akt», - raspavioŭ tady prakuror.

Paźniej čarnahorskija ŭłady zajavili, što hrupu, jakaja płanavała zamach na Džukanaviča, sfarmavali rasiejcy Eduard Šyrokaŭ (pa viersii pravaachoŭnych orhanaŭ, jaho sapraŭdnaje proźvišča - Šyšmakoŭ) i Uładzimir Papoŭ. Pa viersii čarnahorskaj prakuratury, da sproby dziaržaŭnaha pieravarotu datyčnyja rasiejskija śpiecsłužby, supracoŭnikam jakich byŭ Šyšmakoŭ. U 2014 hodzie jon byŭ namieśnikam vajskovaha ataše ŭ Polščy, ale byŭ vysłany z krainy za špijanaž na karyść Rasii i abvieščany piersonaj non hrata.

Vydańnia The Insider i Bellingcat ŭ listapadzie 2018 hoda pa vynikach ułasnaha rasśledavańnia paviedamlali, što sapraŭdnaje imia Papova - Uładzimir Majsiejeŭ i jon źjaŭlajecca supracoŭnikam HRU. Pavodle źviestak Rasrejestru, pisaŭ Bellingcat, Uładzimir Majsiejeŭ pražyvaje ŭ maskoŭskim rajonie Čaromuškach u susiednim domie z Alaksandram Miškinym ( «Alaksandram Piatrovym») - mierkavanym supracoŭnikam HRU i ŭdzielnikam zamachu na Skrypaloŭ.

U Kramli abviarhali choć jakoje dačynieńnie Rasii da sprobaŭ destabilizavać situacyju ŭ Čarnahoryi.

• 0
• 0
• 0
• 0
• 0
• 0
• 0
• 0