Jelizarjeŭ daŭ pres-kanfierencyju ŭ PEN-centry

Dva dni paśla svajoj adstaŭki z pasady kiraŭnika Biełaruskaha baletu, chareohraf Valancin Jelizarjeŭ daŭ pres-kanfierencyju ŭ siadzibie niezaležnaj piśmieńnickaj arhanizacyi, dzie vykazaŭsia nakont situacyi ŭ teatry i pra svaje adnosiny z čynoŭnikami Ministerstva kultury.

U Ministerstvie kultury Jelizarjevu prapanoŭvali zastacca tolki mastackim kiraŭnikom, vyzvaliŭšy pasadu hiendyrektara. U ministerstvie arhumientavali heta tym, što na pasadu patrabujecca «dobry haspadarnik».

Ale, nie znajšoŭšy parazumieńnia ź Minkultam, Valancin Jelizarjeŭ admoviŭsia i daterminova napisaŭ zajavu ab sychodzie z abiedźviuch pasadaŭ.

Na dumku chareohrafa, teatru patrebny dyrektar, što maje aŭtarytet mienavita ŭ mastackaj dziejnaści, a nie ŭ haspadarčaj. «U našym teatry bačać niešta nakštałt filii ministerstva, kudy pavinny pierachodzić čynoŭniki». Jelizarjeŭ ličyć, što «addać teatr małakampietentnamu dyrektaru-haspadarniku, značyć, zahubić teatr ... jaki jość pieradusim tvorčym arhanizmam».

Druhaja pryčyna sychodu Jelizajeva — niezadavolenaść tempami i jakaściu restaŭracyi budynku Opiery. «Heta nie prosta kanfikt mastaka z čynoŭnikami. Rekanstrukcyja teatru idzie ź vialiki ciažkaściami i pramarudžvańniami», — zaznačyŭ Jelizarjeŭ. Pavodle słovaŭ byłoha dyrektara, kali trupa była vysienaja z budynku opiery, ramont nie pačynaŭsia jašče 4 miesiacy, i artysty byli vymušanyja pracavać u absalutna nieprystasavanym Pałacy Respubliki (balet) i Domie Aficeraŭ (opiera). «U dadatak sarvanyja ŭsie terminy zakančeńnia ramontu, a zakładnikami niekampietentnaści čynoŭnikaŭ zrabilisia artysty: naprykład, trupie brakuje pamiaškańniaŭ», — zaznačyŭ Valancin Jelizarjeŭ.

Da ŭsiaho dadałasia kryŭda na biazdušnaść ministra kultury, jaki raźvitaŭsia z pryznanym chareohrafam, navat nie sustreŭšysia.

Pres-kanfierencyja maestra sabrała rekordnuju kolkaść žurnalistaŭ. Jany nie źmiaścilisia ŭ nievialičkim pamiaškańni PEN-Centru. Ich pryvabiła jak tema, tak i fakt praviadzieńnia sustrečy na «niedziaržaŭnaj terytoryi».

* * *

Valancin Jelizarjeŭ (nar. Baku, 1947) kiravaŭ Biełaruskim Baletam ad 1973. Naležyć da rasijskaj baletnaj tradycyi. Jon byŭ padpisantam «zvarotu intelihiencyi» ŭ padtrymku Łukašenki ŭ 1996, kali vyrašałasia, zastaniecca kraina aŭtakratyčnaj ci vierniecca da demakratyi. Jahonaja žonka, Marharyta Izvorska-Jelizarjeva, peŭny čas kiravała Biełaruskaj Opieraj.

• 0
• 0
• 0
• 0
• 0
• 0
• 0
• 0