U kancy červienia ŭkrainskija śpiecsłužby praviali apieracyju na terytoryi tak zvanaj «DNR» i zatrymali byłoha kamandzira SPA ŭ horadzie Śniežnaje Uładzimira Ciemacha. Zacikavić ukrainskich siłavikoŭ Ciemach moh tamu, što pobač z hetym horadam 17 lipienia 2014 hoda byŭ źbity małajzijski «Boinh».
Fakt zatrymańnia Ciemacha paćvierdzili jaho kijeŭski advakat i dačka, jakaja pražyvaje na terytoryi tak zvanaj «DNR».
Były vajskoviec tak zvanych «uzbrojenych sił DNR», Ciemach byŭ zatrymany ŭ svajoj kvatery ŭ horadzie Śniežnaje 27 červienia, paśla čaho niezrazumiełym da kanca sposabam byŭ pierapraŭleny praź liniju sudakranańnia na terytoryju, kantralavanuju ŭkrainskaj armijaj.
«28 červienia ŭ dzień kanstytucyi Ukrainy jon byŭ dastaŭleny ŭ Kijeŭ, a 29 červienia Šaŭčenkaŭski rajonny sud Kijeva pryniaŭ rašeńnie ab jaho aryšcie na dva miesiacy, data apielacyi pakul što nie pryznačanaja», — paviedamiŭ Bi-bi-si advakat zatrymanaha Raman Hontar.
Abmiarkoŭvać inšyja detali spravy abaronca admoviŭsia, spasłaŭšysia na tajamnicu śledstva.
Dačka Uładzimira Ciemacha Maryja raspaviała Bi-bi-si, što pieršym prapažu byłoha vajskoŭca zaŭvažyła jaho žonka, jakaja viarnułasia 27 červienia z pracy i pabačyła doma ślady kryvi i baraćby.
Nastupnyja sutki jaho svajaki sprabavali arhanizavać pošuki źnikłaha, a da viečara 28 červienia atrymali list ad advakata z Kijeva, što na nastupny dzień sud razhledzić pytańnie ab aryšcie Ciemacha.
Zatrymanamu było pradjaŭlenaje abvinavačvańnie pa častcy 1 artykuła 258-3 Kryminalnaha kodeksa Ukrainy — «Stvareńnie terarystyčnaj hrupy abo terarystyčnaj arhanizacyi».
Kali vina Ciemacha budzie dakazanaja, jamu pahražaje ad vaśmi da piatnaccaci hadoŭ pazbaŭleńnia voli. Pakul što sud pryniaŭ rašeńnie ab jaho aryšcie na dva miesiacy — da kanca žniŭnia.
Apieracyju pa zatrymańni Ciemacha ŭkrainskija śpiecsłužby praviali hłyboka ŭ tyle ad linii sudakranańnia.
Śniežnaje znachodzicca za 20 km ad miažy z Rasijaj, najbližejšy punkt na linii sudakranańnia — prykładna za 45 km ad horada.
«Jaki sens vykradać z hłybokaha tyłu? Sa słoŭ advakata my viedajem, što heta zrabili supracoŭniki SBU i što jaho ŭ abychod błokpastoŭ vyvieźli naŭprost praź liniju raźmiežavańnia», — skazała Bi-bi-si dačka zatrymanaha.
U telehram-kanałach, dzie praź niekalki dzion paśla źniknieńnia ŭpieršyniu pačali abmiarkoŭvać mahčymaje zatrymańnie Ciemacha ŭkrainskimi śpiecsłužbami, davali i inšyja viersii.
Tak, daniecki palitołah Raman Maniekin napisaŭ sa spasyłkaj na byłoha kalehu źnikłaha, što jon «na ŭłasnaj mašynie byŭ vyviezieny praz adzin z punktaŭ propuskaŭ («Marjinka») na kalascy pad vyhladam paralizavanaha baćki pa padroblenych dakumientach».
Maryja Ciemach skazała Bi-bi-si, što źviazvaje zatrymańnie svajho baćki z tym, što ŭ 2014 hodzie «jon byŭ načalnikam SPA» ŭ Śniežnym.
«Boinh» zaraz pasprabujuć paviesić na jaho. Ale načalnikam SPA jon ličyŭsia z kastryčnika 2014 hoda, prosta byŭ adzinym takim śpiecyjalistam, — zapeŭnivaje jana. — Kali byŭ źbity «Boinh», jon nie byŭ klučavoj fihuraj — zvyčajny vajskovy, prosta stajaŭ na błokpoście. Jon vyjšaŭ vajavać, jak i ŭsie prychilniki mirnaha žyćcia na našaj ziamli».
Dačka zatrymanaha miarkuje, što ŭkrainskim śpiecsłužbam było viadoma pra toje, što jaje baćka ŭznačalvaŭ SPA ŭ Śniežnym ŭ 2014 hodzie, ale jany nie viedali, što jon, jak kaža Ciemach, nie mieŭ da ich nijakaha dačynieńnia ŭ lipieni, kali byŭ źbity rejs MH-17.
Jak vynikaje z zapisaŭ u vajennym bilecie Uładzimira Ciemacha, 23 kastryčnika 2014 hoda «ministerstvam abarony DNR» jamu było prysvojena zvańnie «pałkoŭnik», u toj momant jon užo zajmaŭ pasadu «načalnika supraćpavietranaj abarony bryhady».
Šaŭčenkaŭski rajonny sud Kijeva pastanaviŭ pakinuć Ciemacha pad aryštam da 25 žniŭnia
Surazmoŭca Bi-bi-si, blizki da kamandavańnia ŭzbrojenych farmiravańniaŭ u «DNR», raspavioŭ, što apieracyju pa zatrymańni Ciemacha pravodziła nie Słužba biaśpieki Ukrainy (SBU), a padraździaleńnie sił śpiecyjalnych apieracyj (SSA) uzbrojenych sił Ukrainy.
Ukrainskija śpiecsłužby pakul što nie rabili nijakich zajaŭ u suviazi z zatrymańniem Ciemacha na niekantralujemaj Ukrainaj terytoryi Danieckaj vobłaści.
U pres-centry apieracyi abjadnanych sił, jakaja pravodzicca na ŭschodzie Ukrainy, Bi-bi-si paviedamili: «My infarmacyju, jakuju raspaŭsiudžvajuć z taho boku, nie kamientujem».
Kamientary