«My ŭžo try tydni na samaizalacyi ŭ vioscy». Čym zajmajucca biełaruskija artysty, kali ŭsie kancerty i śpiektakli admienieny
Praz karanavirus admienienyja kancerty, kampanii nie pravodziać karparatyvy, a teatry praktyčna zakrytyja. «Naša Niva» spytała ŭ biełaruskich artystaŭ, čym jany zaniatyja na karancinie i jak zarablajuć, kali niama hastrolaŭ.
«Možna žyć, ale nie na šyrokuju nahu»
Da pačatku epidemii ŭ repiera Bakieja hrafik byŭ raśpisany da leta: solniki ŭ Biełarusi i Rasii, vystupleńni na fiestyvalach u Kijevie i Talinie. Na jakuju datu ich pieranosić, niezrazumieła.
«Zajavim, kali nasamreč usio projdzie. Situacyja niezrazumiełaja. Płanavać štości bolš, čym na miesiac, nierazumna», — kaža repier.
Studyi hukazapisu ciapier taksama nie pracujuć. Bakiej siadzić doma ŭ samaizalacyi sa svajoj dziaŭčynaj i ŭdaskanalvaje kulinarnyja navyki. Naprykład, hatavaŭ rebry z bulbaj u duchoŭcy, stejki i jušku z ryby muksun. Časam chłopiec jeździć na lecišča dapamahać baćkam.
Dachod repier atrymlivaje za košt adličeńniaŭ ź internet-placovak i kram, dzie pradajecca jaho muzyka.
«Raz na try miesiacy jany raźličvajucca. Možna žyć, ale nie na šyrokuju nahu, kaniečnie, — siaredniačok, — dzielicca Bakiej. — Zatoje ciapier samy čas vypuskać novy materyjał — ludzi siadziać doma, hatovy słuchać».
«U krasaviku nie staviła kancerty pa relihijnych pierakanańniach»
Śpiavačka Alena Łanskaja płanavała tur pa Biełarusi. Ale, kaža, joj pašancavała: na krasavik jana admysłova nie staviła kancerty — pa relihijnych pierakanańniach.
«Sa svajho vopytu prytrymlivajusia mierkavańnia, što publika zaniataja relihijnymi śviatami i ładzić ciapier kancerty z duchoŭnaha punktu hledžańnia niapravilna, — tłumačyć śpiavačka.
— Ja była zasmučanaja, što admianilisia pryvatnyja mierapryjemstvy. Ale nie sumuju, pakolki zakančvaju pracu nad muzyčnym materyjałam».
Asablivych mier biaśpieki na čas epidemii Alena Łanskaja nie prymała. Jana padzialiłasia svaim sposabam umacavańnia imunitetu.
«Ja vielmi strohaja da samoj siabie. U tym liku ŭ adnosinach da zdaroŭja. U mianie jość režym zaniatkaŭ sportam. Dva hady ja nie jem miasa i praktyčna admoviłasia ad małočnych praduktaŭ. Pju zialonuju i travianuju harbatu.
Liču, što časnyk — najlepšy biełaruski afradyzijak. Zaŭsiody viedała, što jon stymuluje imunnuju sistemu».
Ci mocna bje pa kašalku kancertnaje zacišša?
«Mnie nie asabliva šmat treba. Moj racyjon charčavańnia nadzvyčaj ścipły. U mianie ścipłaja siamja, i kali byli składanaści, to mama zaŭsiody kazała: u nas jość bulba, salony ahurok i kisłaja kapusta, nie prapadziom. Ja zapomniła heta na ŭsio žyćcio», — spakojna stavicca da finansavaj situacyi śpiavačka.
«Płanavaŭ u vioscy zapisvać anłajn-kancerty»
Lavon Volski na čas karancinu vyrašyŭ svoj zamiežny tur pieranieści ŭ anłajn-farmat. Ciapier śpiavak praktyčna ŭvieś čas pravodzić u vioscy ŭ Vałožynskim rajonie, tamu i kancerty płanavaŭ tranślavać ź viaskovaj chaty. Ale padvioŭ internet.
«Tut narmalny strym niemahčyma rabić. Huk dobry budzie, a karcinka padvisaje. Tamu vymušany jeździć u horad i ładzić strym z kvatery», — raskazvaje śpiavak.
Padčas minułaj trynślacyi susiedzi nie skardzilisia. Nastupny akustyčny kancert pad hitaru daviadziecca zapisvać a 10-j viečara, tamu mohuć uźniknuć pytańni, uśmichajecca Lavon.
Anłajn-vystupleńni dla zamiežnikaŭ biaspłatnyja, ale achvotnyja mohuć pieravieści achviaravańni na rachunak. Śpiavak kaža, što častku z hetych hrošaj pieradaść daktaram.
«U mianie jość znajomyja miedyki. Budziem da ich źviartacca, adrasna dapamahać».
Z dachodu ciapier zastalisia tolki adličeńni za aŭtarskija pravy. «Ja tut i ŭ Polščy zarehistravany», — dadaje Lavon.
U vioscy u śpievaka spraŭ chapaje. Razhrabaje staryja zavały, raźbirajecca z zapazyčanaściu za płatu za elektraenierhiju, kole drovy i piša karciny.
«Najbližejšyja kinaproby tolki ŭ lipieni»
Akcior Pavieł Charłančuk u hetyja dni zaniaty na anłajn-repietycyjach — Kupałaŭski teatr rychtujecca da premjery «Tutejšych».
«Praz Zoom źviazvajemsia: Mikałaj Mikałajevič Pinihin, usie artysty, zaniatyja ŭ śpiektakli. Čytajem u poŭny hołas dyjałohi, raźbirajem roli», — raskazvaje akcior.
U takim režymie teatr budzie pracavać jak minimum da 26 krasavika. Zdymak u rasijskich sieryjałach i na Biełaruśfilmie ŭ Paŭła taksama niama — jon nie płanavaŭ ich da premjery «Tutejšych». Najbližejšyja kinaproby tolki ŭ lipieni.
«My ciapier pradumvajem anłajn-cikavostki, kab nasycić prastoru Kupałaŭskaha teatra niejkimi prajektami», — kaža jon.
Z padpracovak zastałasia ahučka filmaŭ pa-biełarusku dla «Kinakonha». Artysty buduć jeździć u studyju pa adnym.
Pavieł — baćka piaci dziaciej.
«Pakul što, dziakuj Bohu, kredyty nie braŭ. Žyviom na toj zarobak, što dajuć u teatry. Inšych źbieražeńniaŭ praktyčna niama, tamu što vykanaŭ svaju daŭniuju maru — pierad Novym hodam nabyŭ mašynu na siem miescaŭ, kab usioj siamjoj jeździć».
«My ŭžo try tydni ŭ samaizalacyi»
Viasnoj hurt Naviband mieŭsia prajechacca z turam pa Jeŭropie. U Bierlinie, dzie za dva tydni da kancertu raskupili ŭsie kvitki, dumali navat ładzić jašče adzin solnik. Uletku muzyki pavinny byli vystupić na dvuch fiestyvalach. Ale praz karanavirus usio admianiłasia. Najbližejšy fiestyval, dzie, kali nie pieraškodzić epidemija, možna budzie pačuć hurt, — tolki vosieńniu.
Arciom Łukjanienka i Ksienija Žuk ciapier na Niomanie ŭ samaizalacyi.
«My dobra siabrujem ź siamjoj Źmitra Vajciuškieviča. Pryjechali da ich u hości i ŭžo try tydni tut. Łovim rybu, fizična pracujem. Kožny dzień chodzim pa 10 km pieššu», — raskazvaje Arciom.
Pakul kancertaŭ niama, hurt vykarystoŭvaje čas dla napisańnia muzyki. Abiacajuć, što voś-voś vypuściać novyja pieśni.
Jak zarablać artystam padčas karancinu?
«My atrymlivajem aŭtarskija za ratacyju na radyjo — heta vialiki plus. Taksama niejki dachod z iTunes, ličbavych prodažaŭ», — dzielicca Arciom.
«Hrošaj chopić na miesiacy dva-try ścipłaha žyćcia»
«Karparatyvaŭ niama, viasielli admienienyja. Prablema dla ŭsioj muzyčnaj industryi», — koratka apisvaje situacyju Vital Karpanaŭ, salist hurta «Drazdy».
Sioleta hurtu spaŭniajecca 15 hod, i z hetaj nahody artysty źbiralisia ŭ tur pa krainie. Dumali startavać u sakaviku, abjazdžać pa 6-7 haradoŭ na miesiac. «Dla nas heta narmalny temp», — tłumačyć Vital. Tur, zrazumieła, adkłaŭsia.
«Niepryjemna, ale nam jość čym zajmacca. Raniej my ž vypuskali albomy na dyskach, a ciapier zalivajem ich u sieciva, — dzielicca artyst. — Vypusk novaha materyjału adkłali. Ciapier ludziam nie da viasiołych pieśniaŭ pra kachańnie — nie chočacca rabić premjery, jakija projduć mima».
Finansavaja paduška biaśpieki ŭ muzykaŭ jość.
«Na miesiacy dva-try ścipłaha žyćcia chopić. Niama takoha, što skardzimsia, kažam, što drenna. Ja jašče pracuju na radyjo, viadu biełaruski chit-parad. Heta nievialikaja hrošy, ale tam možna rabić pracu addalena.
Na hetym tydni płanavali zdymać dva klipy, ale pastavili na paŭzu, bo heta vialikija hrošy, jakija za miesiac my nie adabjem».
Anłajn-kancerty, jakija adyhraŭ hurt, hrošy nie prynosiać. Vital tłumačyć, što kali na takich tranślacyjach i źbirajuć srodki, to tolki ŭ padtrymku daktaram.
Śpiavak nie hublaje aptymizmu.
«Myju ŭsio, što prasili myć, i starajusia nie tusavacca na vialikich mierapryjemstvach», — uśmichajecca Vital.
Ciapier čytajuć
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary